Шоир Йўлчи Рўзиев Юлдуз Усмоновадан «Хаста бўлма» шеъри учун 3 йилдан буён қалам ҳақини ололмаётгани ҳақида хабар берилганди. Фуқаролик ишлари бўйича Мирзо Улуғбек туманлараро суди Юлдуз Усмоновадан даъвогар учун компенсация ва товон пули ундириш ҳақида қарор чиқарган. МИБ матбуот хизматининг «Дарё»га маълум қилишича, ҳозирги кунга қадар ижро ҳаракатлари давом эттириш юзасидан тегишли суд томонидан кўрсатма келиб тушмаган.
Фуқаролик ишлари бўйича Мирзо Улуғбек туманлараро судининг 29 октябрь куни қабул қилинган ҳал қилув қарори билан даъво ариза қисман қаноатлантирилиб, Юлдуз Усмоновадан даъвогар Йўлчи Рўзиевга 50 миллион сўм маънавий зарар учун компенсация, мазкур даъво ариза билан мурожаат қилишда тўланган 1 миллион 80 минг сўм миқдорида давлат божи, қонун ҳужжатларида белгиланган БҲМнинг 500 баравари миқдорида (135 миллион сўм) товон пули жами 186 миллион 80 минг сўм ва давлат фойдасига 5 миллион 400 минг сўм ундириш белгиланган.
Маблағларни ундириш тўғрисидаги ижро варақаси юзасидан қарздор Юлдуз Усмоновага нисбатан иккита ижро иши бюронинг Мирзо Улуғбек туман бўлимига 2022 йил 2 февралда ижро иши юритувига келиб тушган.
Мазкур ижро варақлар юзасидан шу куни давлат ижрочиси томонидан қабул қилинган «ижро иши юритишни қўзғатиш тўғрисида»ги қарорига мувофиқ, ижро иши талабини ихтиёрий равишда бажариш учун қарздор Юлдуз Усмоновага 10 кунлик муддат белгиланган.
«Шундан сўнг, фуқаролик ишлари бўйича Мирзо Улуғбек туманлараро суди томонидан ижро иши вақтинчалик тўхтатилган. Ҳозирги кунга қадар ижро ҳаракатлари давом эттириш юзасидан тегишли суд томонидан кўрсатма келиб тушмаган», — дейилади хабарда.
Таъкидланишича, ижро ишини давом эттириш ҳақида суднинг тегишли ҳужжати келиши билан ижро ҳаракатларига киришилади.
Шоир Йўлчи Рўзиев Ўзбекистон халқ артисти Юлдуз Усмонованинг «Хаста бўлма» ҳамда «Севги изҳори» қўшиқлари матни муаллифи ҳисобланади. Юлдуз Усмонова «Хаста бўлма» қўшиғи матнига қалам ҳақи сифатида шоирнинг шеърий тўплами чоп этилишига кўмаклашишга ваъда берган. Бироқ Йўлчи Рўзиев бир неча йиллардан буён санъаткордан шеъри учун қалам ҳақини ололмаяпти.
Мавзуга доир: Олий суд ҳам Юлдуз Усмонованинг «Хаста бўлма» шеъри муаллифига товон пули тўлаши бўйича қарорни ўзгартиришсиз қолдирди
Изоҳ (0)