Фарғона вилояти Ёзёвон тумани «Гулистон» маҳалласида жойлашган чойхонадаги қиморхона фош этилди. Бу ҳақда «Дарё»га вилоят ИИБ ахборот хизмати хабар берди.
Қайд этилишича, 2022 йилнинг 16 март куни Фарғона вилояти ИИБ ЖҚБ ходимлари томонидан тезкор тадбир ўтказилган. Тадбир давомида «Гулистон» маҳалласида жойлашган чойхонада М.М. ўн нафар шахсни йиғиб, таваккалчиликка асосланган қимор ўйинини ташкиллаштиргани ва ўйин учун 150 минг сўм ижара ҳақи олгани аниқланган.Воқеа жойидан 1900 доллар, 12 миллион 502 минг сўм пуллар тегишли тартибда расмийлаштирилиб олинган.
Мазкур ҳолат юзасидан Ёзёвон тумани ҳузуридаги тергов бўлинмаси томонидан М.М.га нисбатан Жиноят кодексининг 278-моддаси 2-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, Жиноят кодексининг 278-моддасида кўрсатилган жиноятни содир этган шахс 7 йилгача озодликдан маҳрум қилиш билан жазоланади.
Изоҳ (0)