ДХХ Самарқанд вилоят бошқармаси ҳамда вилоят ИИБ ходимлари ҳамкорлигида ўтказилган тезкор тадбирда бир гуруҳ шахсларнинг таркибида олтин моддаси бўлган рудаларни ноқонуний тарзда қайта ишлаш ҳолатига чек қўйилди. Бу ҳақда «Дарё» мухбири Фарҳод Норбўтаев хабар берди.
Вилоятнинг Пахтачи туманида яшовчи фуқаролар — 1982 йилда туғилган С.Ғ., 1992 йилда туғилган Т.А. ва 1997 йилда туғилган Р.Ф.ларнинг яшаш хонадонлари кўздан кечирилганда улардан соф олтин моддаси бўлган, тахминан, 3,8 тонна руда тошлар ҳамда учта тош тегирмони, иккита олтин рудасини тозалашга мўлжалланган «мойка» ускуналари топилган. Холислар иштирокида ҳужжатлар расмийлаштирилган.
Шунингдек, мазкур руда тошларини қайта ишлашда электр тармоқларидан ноқонуний фойдаланиб, давлатга 239 миллион сўм зарар етказилганлиги аниқланган.
Ҳолат юзасидан юқоридаги шахсларга нисбатан Жиноят кодексининг тегишли моддалари билан жиноят иши қўзғатилиши режалаштирилиб, суриштирув ҳаракатлари олиб борилмоқда.
Изоҳ (0)