Навоийдаги «Нурота» меҳмонхонаси 17 млрд сўмга аукционга қўйилди

Навоий вилояти Нурота туманидаги «Нурота» меҳмонхонаси кимошди савдосига қўйилди. Лот маълумотлари «E-auksion» порталида эълон қилинган.

«Нурота» меҳмонхонаси 50 кишига мўлжалланган. 2017 йилда қурилган 3 қаватли бино 35 хонадан иборат.

Ер участкасининг умумий майдони 0,97 гектар. Бинонинг майдони — 926 квадрат метр. Меҳмонхонада газ, сув, электр таъминоти ва канализация тизими мавжуд. 

Лот изоҳида ёзилишича, меҳмонхона барча жиҳозлари билан савдога қўйилмоқда.

Аукционга қўйилган меҳмонхонанинг бошланғич баҳоси — 17,32 млрд сўм. Аризалар 14 апрель 09:00 га қадар қабул қилинади. Савдолар худди шу куни 10:00 да бошланади.

Аввалроқ Жиззахда қурилиши тугалланмаган кўп қаватли бино 5,6 млрд сўмга аукционга қўйилгани ҳақида хабар берилган эди.