16-mart kuni erta tongdan Toshkent aeroporti hududida kuzatilgan noqulay ob-havo sharoiti — quyuq tuman sabab bir qator reyslar uchish va qo‘nishni amalga oshira olmadi, deb xabar beradi Uzbekistan Airports matbuot xizmati.
Noqulay ob-havo sharoiti tufayli — ko‘rish masofasi 200 metr atrofida — Air Cairo aviakompaniyasining Sharm-ash-Shayx—Toshkent yo‘nalishi bo‘yicha uchgan bortida 172 nafar yo‘lovchi bor samolyoti soat 09:35 da Navoiy aeroportiga qo‘ndi.
Oldinroq Toshkent aeroportidagi kuchli tuman tufayli Turkish Airlines aviakompaniyasining Istanbuldan parvoz qilgan THY-368 reysi belgilangan aeroportga qo‘na olmay, soat 08:45 da Bishkekdagi (Qirg‘iziston) zaxira aerodromiga yo‘naltirilgan edi.
Ma’lum qilinishicha, Toshkent vaqti bilan soat 10:14 da poytaxt aeroportidagi cheklovlar olib tashlangan. Hozirda ko‘rish masofasi 2000 metr atrofida. Turkish Airlines aviakompaniyasining THY-368 reysi Toshkentga 11:47 da, Air Cairo samolyoti esa 12:07 da kelib qo‘ngan.
Eslatib o‘tamiz, yanvar oxirlarida Toshkent va Istanbul o‘rtasidagi qator aviaparvozlar kuchli qor sabab bekor qilingan, Istanbuldan Urganchga kelayotgan reys noqulay ob-havo tufayli Toshkentga yo‘naltirilgan edi.
Izoh (0)