Россия 313 нафар Канада фуқаросини, жумладан, мамлакат ҳукумати, Ташқи ишлар ва Мудофаа вазирлиги раҳбарларини санкциялар рўйхатига киритди. Бу ҳақда Россия ТИВ матбуот хизмати хабар берди.

15 мартдан бошлаб Канада бош вазири Жастин Трюдо, ташқи ишлар ва миллий мудофаа вазирлари Мелани Жоли ва Анита Ананд Россияга кириши тақиқланган шахслар «қора рўйхати»га киритилган. Шунингдек, Канада парламенти қуйи палатасининг аксарият депутатлари тақиққа учраган.

Бундан ташқари, Россиянинг санкцияга учраганлар рўйхатига Канада халқаро савдо вазири Мери Анг, жамоат хавфсизлиги вазири Марко Мендисино, инновация ва илм-фан ишлари вазири Француа-Филипп Шампан, Ижтимоий ривожланиш вазирлиги раҳбари Карина Гулд ва бошқа юқори мартабали амалдорлар ҳам киритилган.

Россия Ташқи ишлар вазирлигининг таъкидлашича, ушбу чоралар «Оттава томонидан талвасада жорий этилган барча янги санкциялар»га жавобан қўлланилмоқда.

Россия Ташқи ишлар вазирлиги мамлакатга киришни тақиқлаш қарори мажбурий характерга эга экани ва «Канаданинг амалдаги режимининг одоб-ахлоқдан ташқарига чиқадиган душманона ҳаракатларига» жавобан қабул қилинганини таъкидлаган.

Аввалроқ Канада ҳукумати Путин, Медведов ва Россиянинг бир қатор вазирларига қарши, шунингдек, Дерипаска, Песков, Соловёв, Симонян, Эрнст ва бошқа россияликларга нисбатан санкциялар қўллаган. Канада бош вазири Жастин Трюдо Россия нефтини импорт қилишни тақиқлаб, нефтдан олинадиган даромадлар Россия президенти Владимир Путин ва россиялик олигархларни қўллаб-қувватлашга ёрдам бераётган бўлиши мумкинлигини айтганди.