PACE Россияни Европа Кенгашидан чиқариш учун овоз берди

Европа Кенгаши Парламент Ассамблеяси (PACE) вакиллари 15 март куни бир овоздан Россияни Европа Кенгашидан чиқаришга чақирди. Бу ҳақда ташкилот сайтида хабар берилган.

Унга кўра, 216 киши қарорни ёқлаб овоз берган, уч киши бетараф қолган.

«Ассамблея бир овоздан маъқуллаб, Европа Кенгаши Вазирлар қўмитасини Россиянинг зудлик билан Европа Кенгашидан чиқишини талаб қилишга чақирди», — дейилади хабарда.

Ассамблея Россия Федерацияси энди ташкилотга аъзо давлат бўла олмайди, деб ҳисобламоқда.

Аввалроқ Давлат Думаси вице-спикери, Россиянинг PACE’даги делегацияси раҳбари Пётр Толстой Россиянинг Европа Кенгашидан чиқиши тўғрисида қарор қабул қилингани ҳамда ташқи ишлар вазири Сергей Лавровнинг тегишли хати Европа Кенгашининг бош котибига топширилгани ҳақида маълум қилганди.

«Европа Кенгашидан чиқиш тўғрисида қарор қабул қилинган. Ташқи ишлар вазири Сергей Лавровнинг тегишли мактуби ташкилот бош котибига топширилган», — деб ёзди Толстой ўзининг Telegram-каналида.

Унинг таъкидлашича, «Россия Европа Кенгашидан ўз хоҳиши билан чиқмоқда, бу ҳар томонлама ўйланган ва кўриб чиқилган қарор».

Шунингдек, Россия Европа Кенгаши низомини, Инсон ҳуқуқлари бўйича Европа конвенциясини, яна тўртта конвенцияни ва Россия манфаатларига тўғри келмайдиган қатор ҳужжатларни денонсация (бекор) қилади, деди федерация кенгаши раиси ўринбосари Константин Косачев.

Аввалроқ Россия Европа кенгашининг ишларида ортиқ иштирок этмаслигини билдирганди. Ўша пайтда Россия ТИВ матбуот котиби Мария Захарова бу Россиянинг Европа кенгашидан чиқишини англатадими, деган саволга жавоб бермаган.