Россия Қуролли кучлари Украинадаги Херсон вилояти ҳудудини тўлиқ назоратга олди. Бу ҳақда Россия Мудофаа вазирлиги расмий вакили Игорь Конашенковга таяниб, «Интерфакс» хабар берди.
«Россия Қуролли кучлари томонидан Херсон вилоятининг бутун ҳудуди тўлиқ назорат остига олинди. Донецк Халқ Республикаси қўшинлари ҳужум операцияларини давом эттириб, украин миллатчиларининг мудофаасини ёриб ўтиб, ‘Пантелеймоновка’ аҳоли пунктини назоратга олди ва ‘Верхнетореское’ — ‘Новоселовка-2’ чизиғига етиб борди», — дейди Конашенков.
Шунингдек, идора Украинанинг ҳаво ва ердаги турли техникалари, хусусан, Краматорск шаҳри яқинидаги ҳарбий аэродром ангарида сақланган тўртта Су-25 самолёти, битта Ми-24 ҳамда бешта Ми-8 вертолёти йўқ қилинганини маълум қилган.
Маълумотларга кўра, уруш бошланганидан буён Россия ҳарбийлари томонидан 156 та учувчисиз учиш аппарати, 1306 та танк ва бошқа турдаги зирҳланган жанговар машиналар, 127 та реактив залп ўт очиш тизими, 471 та дала артиллериясида ва миномёти, шунингдек, 1054 та махсус ҳарбий автомобиль техникасига йўқ қилинган.
Аввалроқ Украина ҳукумати Херсон вилоятининг бир қисми Россия қўшинлари томонидан эгаллаб олинганини маълум қилганди. Херсон вилояти прокуратураси Россиянинг вилоятда «ноқонуний референдум» ўтказиш ва ХХР номи остида республика ташкил этиш режалари ҳақида айтган. Шу сабабли идора жиноят иши қўзғатган. Бундан ташқари, маҳаллий депутатларни россиялик ҳарбийлар билан ҳамкорлик қилишга кўндиришга уринилаётгани маълум қилинган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)