Россия президенти Владимир Путин 14 март куни Исроил бош вазири Нафтали Беннет билан телефон орқали қилган суҳбат давомида Украинадаги вазиятни муҳокама қилди. Суҳбатда Путин 14 март куни Донецкка берилган ракета зарбаси оқибатида 20 нафар тинч аҳоли вакилининг ҳалок бўлганини қоралаган, деб ёзмоқда «Коммерсантъ».
«Владимир Путин Украина ҳарбийларининг Донецк марказий мавзесига уюштирган ‘варварларча’ ракета ҳужумига эътибор қаратди»,— дейилади Кремль расмий сайтидаги хабарда.
Нафтали Беннет Россия президентига Украина масаласини бир қатор давлатларнинг раҳбарлари билан мулоқотларда муҳокама қилгани ҳақида ахборот берди. Ўз навбатида Владимир Путин сўнгги кунларда видеоформатда ўтган Россия—Украина музокараларига баҳо берди.
Исроил бош вазири Нафтали Беннет ва Украина президенти Владимир Зеленский 13 март куни телефонда суҳбатлашган, суҳбат давомида Украинадаги уруш ҳаракатларига чек қўйишда Исроилнинг кўмак беришга тайёрлигини таъкидлаганди. Шунингдек, Туркия, Қозоғистон, Қирғизистон ва Озарбайжон каби давлатлар ҳам Россия—Украина музокараларида воситачилик қилишга тайёрлигини билдирган. Зеленский музокараларнинг асосий мақсади Владимир Путин билан учрашиш эканлигини айтиб ўтган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)