Туркманистонда 12 март куни бўлиб ўтган муддатидан олдинги президентлик сайловларида Гурбангули Бердимуҳамедовнинг ўғли Сердар Бердимуҳамедов ғалаба қозонди — у 72,97 фоиз овоз тўплаган. Бу ҳақда мамлакат Марказий сайлов комиссияси эълон қилди.
Туркманистондаги сайловларда жами 9 нафар номзод иштирок этган. Сердар Бердимуҳамедовдан ташқари яна 8 номзод қайд этган натижалар:
- Иқтисодий мактаб директори Перхат Гуванчгулиевич Бегенжов — 2,02 фоиз;
- Марий вилояти ҳокимининг ўринбосари Оғажон Букмирадов — 7,22 фоиз;
- «Аwаза» санаторийси бош шифокори, Туркманистон Мажлиси депутати Бердимаммет Ханмамедович Курбанов — 2,22 фоиз;
- «Wепалй гурлуşйк» қишлоқ хўжалиги раҳбари Мередов Бабамурат Тиркешович — 1,08 фоиз;
- Туркман жисмоний маданият ва спорт институти проректори Хидир Какабаевич Нуннаев — 11,09 фоиз;
- Туркманистон демократик партияси Тошҳовуз вилояти Сапармурод Туркманбоши этрапи қўмитаси раҳбари Максат Мирадович Одешов — 1,15 фоиз;
- Ахал вилояти Бабадайхон этрапи санитар-эпидемиологик хизмати раҳбари Максатмурад Аширгелдиевич Овезгелдиев — 1,16 фоиз;
- Туркманистон давлат энергетика институти «Қайта тикланувчи энергия манбалари» ишлаб чиқариш маркази директори Какагелди Атажанович Сариев — 1,09 фоиз овоз олган.
Туркманистондаги президентлик сайловларида 97,12 фоиз сайловчи овоз берган. Овоз бериш учун жами 3 миллион 435 минг 950 нафар сайловчи рўйхатдан ўтган ва 2577 та сайлов участкаси ташкил қилинган.
Туркманистон президенти вазифасини бажарувчи Гурбангули Бердимуҳамедов Ашхободдаги Аннаниёз Ортиқ номидаги 68-мактабда ташкил қилинган сайлов участкасида овоз берган эди.
Туркманистонда президентликка номзод бош вазир ўринбосари Сердар Бердимуҳамедов эса оиласи билан сайлов участкасига бобоси Маликгули Бердимуҳамедовнинг ВАЗ-2107 машинасида келганди.
Эслатиб ўтамиз, 11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов раҳбарликни ёшларга топшириш ва фаолиятини Халқ маслаҳати раиси сифатида давом эттириш ниятини маълум қилди.
Изоҳ (0)