Россия прокуратураси Украинадаги уруш фонида Россияда бизнес юритишни тўхтатишга қарор қилган ғарб компанияларининг активлари ва ходимларини ҳибсга олиш билан таҳдид қилди. Бу ҳақда The Wall Street Journal манбаларига таяниб, хабар берди.
Хусусан, гап Россия ҳукуматини танқид қилган брендлар ва уларнинг раҳбарларини ҳибсга олиш ҳақида кетмоқда, деб ёзади газета.
Бундай таҳдидларни озиқ-овқат, кийим-кечак ва дастурий таъминот ишлаб чиқарувчи хорижий компаниялар, шунингдек, ресторанлар тармоғи эгалари хатлар, телефон қўнғироқлари орқали ҳамда прокурорларнинг ташрифи чоғида олган. Мазкур компаниялар орасида Coca-Cola, McDonald’s, Procter & Gamble, IBM ва Yum Brands (KFC’нинг эгаси) бор.
Нашр манбаларининг хабар беришича, таҳдидлар фонида камида битта хорижий компания Россия идораси ва бошқа бўлинмалари ўртасидаги ёзишмаларнинг қўлга тушиши мумкинлигидан қўрқиб, алоқани чеклашга қарор қилган. Бошқа фирмалар ўз топ-менежерларини Россиядан олиб кетган, дейилади хабарда.
Россиянинг АҚШдаги элчихонаси Wall Street Journal мақоласини «фантастик» деб атади. Россия прокуратураси ҳам, мақолада тилга олинган Ғарб компаниялари ҳам бу ҳақда ҳозирча изоҳ бермаган.
Мавзуга доир:
- «На сиёсат, на журналистика, на тўғри ишлайдиган бирорта юридик институт қолди» — Россияни тарк этаётган юлдузлар
- Европаликлар ва америкаликлар Ўзбекистон ва бошқа мамлакатлар орқали Россияни тарк этмоқда
- Visa ва Mastercard Россиядаги фаолиятини тўхтатди
- Дунёнинг учта энг йирик овоз ёзиш компаниялари Россиядаги фаолиятини тўхтатди
Изоҳ (0)