Қозоғистонда январдаги тартибсизликлар чоғида қанча одам ҳалок бўлгани маълум қилинди

Қозоғистонда январь ойида бўлиб ўтган оммавий тартибсизликлар чоғида жами 230 киши ҳалок бўлган. Бу ҳақда мамлакат бош прокурор Берик Асилов ялпи мажлисда маълум қилди, деб ёзмоқда Tengrinews.

«Ҳалок бўлганлар рўйхатини расман эълон қилганимиз йўқ. Биринчи навбатда ким жиноятчи, ким тинч намойиш иштирокчиси бўлганини ўрганиш керак. Тергов жараёнида буларнинг барчасини аниқлашимиз зарур, кейин маълумот берамиз», — деди бош прокурор.

Қозоғистон бош вазирнинг биринчи ўринбосари Роман Скляр тартибсизликларда давлат биноларига етказилган зарарнинг умумий миқдорини ҳам ошкор қилди. Унинг айтишича, умумий зарар 30 миллиард тенгени (639,6 миллион доллар) ташкил қилган.

«Январь воқеалари чоғида мамлакатнинг саккиз вилоятида 42 та давлат биноси зарар кўрган. Булар Олмаота, Чимкент, Олмаота вилояти, Жамбил, Қизилўрда, Атирау, Ақтўбе ва Шарқий Қозоғистон вилоятлари шаҳарларидаги бинолар. Зарарнинг умумий миқдори 30 миллиард тенгега яқинни ташкил этган. Жумладан, республика ҳисобидан 28 миллиард тенге бюджетдан 18 та объектни қайта тиклаш учун ажратилди», — деди бош вазирнинг биринчи ўринбосари.

Қозоғистон ички ишлар вазири Марат Ахметжанов январдаги тартибсизликлардан кейин қотиллик бўйича 90 та жиноий иш тергов қилинаётганини айтди.

Ахметжановнинг сўзларига кўра, январь воқеаларидан буён полиция 2919 та жиноий иш олиб бормоқда.

«Асосан, булар қотиллик бўйича — 90, ўғирлик бўйича — 2183, қурол-яроғнинг ноқонуний муомаласи бўйича — 428, ўзгалар мулкига қасддан зарар етказиш бўйича — 164 та. Айни пайтда мингдан ортиқ шахс жиноий жавобгарликка тортилмоқда», — деди Ахметжанов мажлисда.

Мамлакат бош прокуратураси намойишлар сабаб, шунингдек, 19 нафар хориж фуқаросига нисбатан жиноят иши қўзғатилгани, улардан 11 нафари ўзбекистонлик экани ҳақида хабар берганди.