Россия ҳукумати 16 март, чоршанба куни 117 млн долларлик облигациялар бўйича фоизларни тўлаши керак. Ўша кунги тўловлар Россиянинг хорижий валютадаги дефолтига олиб келиши мумкин. Бу ҳақда Bloomberg хабар бермоқда.
Bloomberg воқеалар ривожининг учта эҳтимолий сценарийсини келтириб ўтган. Биринчидан, Россия доллар облигациялари бўйича фоизларни долларда тўлаши керак. Бу қарз инқирозини вақтинча олдини олишга имкон беради. Инвесторлар 4 апрелда муддати тугайдиган доллар облигациялари бўйича тўловларни кутишмоқда.
Иккинчи сценарийда Россия рублдаги облигацияларини қайтариб олиши мумкин. Баъзи облигация шартномаларида бу вариант кўзда тутилган. Бироқ 16 март куни тўланиши керак бўлган облигациялар билан бунақа эмас.
Bloomberg келтирган учинчи сценарийга кўра, Россия қарзларни умуман тўламайди. Бундай ҳолда, Россияда 15 апрелгача вазиятни тўғрилаш учун 30 кунлик имтиёзли давр бўлади, акс ҳолда классик оғир дефолт юзага келади: Россия молиялаштиришга киришдан блокланади, инвесторлар маблағларини йўқотади.
Россия Молия вазирлиги 16 март куни 117,2 млн долларлик облигацияларни тўлаш бўйича топшириқ берган, бироқ пул қайси валютада тўланишини кўрсатилмаган. 14 март куни Молия вазирлиги томонидан хорижий валютадаги давлат қарзларини тўлашнинг вақтинчалик тартиби тасдиқланди. Бундан келиб чиқадики, агар хорижий банклар Россиянинг халқаро захиралари музлатилганлиги сабабли ушбу тўловни амалга ошира олмаса, еврооблигациялар бўйича тўловлар рублда амалга оширилади.
Кремлнинг фикрича, Россияда ҳеч қандай дефолт хавфи йўқ.
Биз барча ташқи қарзларни рублда тўлаш учун зарур хавфсизлик чораларини кўрганмиз. Аслида, дефолт учун ҳеч қандай хавф йўқ, агар улар сун;ий равишда бизга қарши яратилмаса, — дейди Россия президентининг матбуот котиби Дмитрий Песков.Аммо таҳлилчилар шу йилнинг ўзида Россия дефолтининг юзага келиши эҳтимоли тахминан 70 фоиз деб баҳоламоқда. Fitch Ratings агентлиги эса буни «муқаррар» деб атади.
Изоҳ (0)