«Толибон» томонидан шакллантирилган Афғонистон ҳукумати Қирғизистондан афғон қишлоқ хўжалиги маҳсулотларини Россия бозорига экспорт қилишда ёрдам сўради. Бу борадаги тегишли баёнот «Толибон» ташқи ишлар вазири Амирхон Муттақий Қирғизистон ташқи ишлар вазири Руслан Қозоқбоев билан Анталияда ўтказилган дипломатик форум доирасида эълон қилинган, деб хабар беради Қирғизистон ТИВ матбуот хизмати.
Қозоқбоев минтақа давлатлари ўртасидаги транспорт-транзит салоҳиятидан тўлиқроқ фойдаланишга чақирган.
«Афғон томони қитъанинг шимоли ва жанубини боғловчи савдо йўлларини йўлга қўйишни таклиф қилди ҳамда Афғонистондан қишлоқ хўжалиги маҳсулотларини Россия бозорига олиб чиқишда Қирғизистоннинг манфаатдорлик ва транзит имкониятларини ҳисобга олган ҳолда кўмаклашиш сўровини билдирди», — дейилади матбуот хизмати хабарида.
Қирғизистон Ташқи ишлар вазирлиги раҳбари, шунингдек, CASA-1000 минтақавий энергетика лойиҳасини амалга оширишни давом эттиришга ҳам эътибор қаратган.
«Толибон», ўз навбатида, Марказий Осиё ва Афғонистон ўртасидаги ҳамкорликни мустаҳкамлаш масалаларини кўриб чиқиш ва Кобулда хавфсизлик масалалари бўйича конференция ўтказишни таклиф қилган.
Бундан ташқари, Муттақий Бадахшонни «маҳаллий аҳоли, жумладан, Афғонистоннинг Катта ва Кичик Помирларида яшовчи этник қирғизлар манфаати учун касалхоналар ва мактаблар қуриш орқали» биргаликда ривожлантириш лойиҳасини таклиф қилган.
Бундан олдин Афғонистондаги барча давлат университетлари йигит-қизлар учун қайта очилгани, Афғонистонда гуманитар ёрдамга муҳтож болалар сони 13 миллиондан ошиб кетгани тўғрисида хабар берилганди.
Изоҳ (0)