2022 йил 3 март куни пойтахтдаги муҳташам ресторанларнинг бирида актёр ва режиссёр Азиз Раметовнинг никоҳ оқшоми бўлиб ўтди. Бу йил 34 ёшни қаршилаган актёр Шаҳлохон Умарова исмли қизга уйланди. Жуфтлик Milliy TV каналининг «Бахтлимиз» кўрсатуви берган интервьюсида қандай қилиб танишгани ҳақида сўзлаб берди.
«Мен Умарова Шаҳло – 1993 йилда Сурхондарё вилояти Денов туманида туғилганман. 28 ёшдаман. Оилада иккита фарзандмиз, укам ва мен. Азиз акани клип ва киноларда кўрганман. «Мени кечир» кўрсатувида бир қизиқ воқеа бўлган, фақат ўзларига айтмаганман. Ойиларидан кечирим сўраб, жуда ҳам чиройли кўрсатув тайёрланган. Ўша вақтда уйдагиларга айтганман, мен шу болага турмушга чиқаман, кўрасизлар, деб. Шунчаки, ўша пайтда ростдан ҳам ёқиб кетганлар. Ойим устимдан кулганлар. Орзуга айб йўқ, деганман. Инсон сифатида кўпроқ яхши хотира берганлар. «Арслон изидан» фильмини тушуниш учун 10—12 марта кўриб чиққанман. У пайтларда ҳис-туйғу бўлмаган, шунчаки томошабин сифатида ижодларини, истеъдодларини ҳурмат қилганман», — дейди Шаҳло Умарова.
«Оила – бу масъулият. Мен бу масъулиятдан жуда қўрқаман. Бошқаси берилса, кўтарарман, лекин оиланикидан қўрқаман. Миш-мишлар бўлади-да, бўлгани яхши. Севган қизим турмушга чиққани бу ёлғон. Мен агар ростан севсам, бировга бериб қўядиган бола эмасман», — дейди актёр Азиз Раметов.
Актриса Саида Раметова Сурхондарёдан келин қилгани ҳақида шундай дейди:
«Биз мана Тошкентда яшаймиз. Лекин ўзим самарқандлик, хўжайин туркистонлик. Худога шукр, бутун республика, вилоят бирлашяпмиз, қуда-андачилик бўляпти. Ўзимга айтаманда, бахтли онаман, бахтли қайнонаман. Кўпчилик агар қизимни олсангиз, жон деб бераман, аввал Азизжон учун, кейин сиз учун. Чунки сиз яхши қайнонасизда, дейишади. Мен бундан хурсанд бўламан. Яқин-яқиндаям театримизга келиб, қизларни расмини кўрсатишар эди. Мен жон деб келин қиламан, лекин гап ўғлимда-да, яшайдиган ўғлим, дейман».
Шаҳло Умарованинг айтишича, Азиз Раметов билан илк марта Instagram орқали танишган.
«Танишувимиз Instagram орқали бўлди. Ёзишдик, гаплашдик мени соҳам бўйича. Кейин кўришганда, ойиларини номи билан бренд маҳсулот чиқаришини айтдилар. Бирга ишладик, характерлари, инсонийлиги, Азиз акада жуда ҳам меҳрибончилик кучли, самимийлар. Шуларни ҳурмат қилиб, кўнглим тушган», – дейди Шаҳло.
Азиз Раметов эса илк танишувни қуйидагича таърифлайди:
«Суҳбат суҳбатга уланди. Менга Instagram’да реклама қўйдирдилар, мен уларга мурожаат қилдим. Очиғини айтаман, баракали пул кирди ундан. ‘Онамга «Saida Collection» бренди остида рўмол ва шарфлар чиқаряпмиз. Сиз шу тошдан чиройли қилиб ёзиб беринг’, – дедим. Кейин Шаҳло ҳам реклама қилиб беришимни илтимос қилдилар. Рекламани пули, уят бўлса ҳам айтаман, жуда баракали бўлди. Ўзи кўп пул эмас, лекин баракали бўлди. Кўп пул ишлатаман, баракаси бўлмаган. ‘Онам, балки шу қиз келин бўлар’, – дедилар. Балки турмушга чиққандир деб ўйлаб, бу масалани онамнинг ўзига топширдим. Шу тарзда бир йил дўстлашдик, кўнглимни овладилар».
Саида Раметованинг сўзларига кўра Шаҳло Настарин тахаллуси билан ижод қилади. Унинг қўли гул, кўп санъаткор аёллар билан ҳам ҳамкорликда ишлаган. Саида Раметова ҳам ўзи нарсалар буюрган. Актрисанинг катта келини билан ҳам бирга ишлаган. Ўша вақтдаёқ қизнинг одоби, ахлоқи, муомаласи актрисага маъқул келган бўлса-да, лекин келин қилиш хаёлига ҳам келмаган.
«Мен билмайман, ҳали яшаб кўрмаганман. Лекин актёр сифатида айтяпман, уйланиб қўйиб, нима қилдинг, деган кишидек эмас. Аёл киши севса, жуда ёмон севади, қаттиқ севади. Дўстлик бўлса, кейин севги бўлса, ана ўша аёл қийналмайди. Муҳаббат, севиб қолдингми, ўртасини ол дўстим. Муҳаббатга кўп кириб кетилса, қарамлик бўлади. Эртага уни кўролмай қолиш мумкин, ишда бўлар, менга эътибор бермаяпти деб, хиёнат бошланади. Шунинг учун ҳар бир нарсани ўртасини олиш керак. Қизларнинг эркин даври яхши кўрганига турмушга чиқадиган даври. Аввалги замон эмас ҳозир», – дейди актёр.
Шаҳло кўрсатувда илк марта юзидаги безагини нима мақсадда таққани ҳақида ҳам сўзлаб берди.
«Уйимда ҳеч ким қаршилик билдирмаган. Танловимни ҳурмат қилишган. Азиз акани таниган вақтимдан билганман, рашк қилиш ёқмайди. Ўзимни бу нарсага кўниктирганман. Совчи келганида, истиҳора намозини ўқиганман. Бувим шундан кейин алоҳида тушунтирдилар: ‘Қизим, Азиз чиройли бола, ошиғи мингта. Эртага яшаб кетишинг учун сабрли бўлишинг керак. Рашк қилиш керак эмас. Рашк эр-хотиннинг энг катта урушига сабаб бўлиши мумкин. Рашк қилишингдан олдин ўйлаб кўр, ўша инсондан бутунлай кета олишингга ақлинг етадими? Ёки шундай қилиб орани узиб кетишинг керак. Агар у инсон сенга керак бўлса, қадрли бўлса, ҳеч қачон рашк қилмайсан. Ичингга ютасан, сабр қиласан, Аллоҳдан сўрайсан. Агар аёл ўзига ишонса, эрига кераклигини ҳис қилса, менимча рашк қилмайди», – дея қўшимча қилди Шаҳло.
«Санъаткорга рафиқа бўлиш, санъаткорга келин бўлиш ҳақиқатан ҳам осон эмас. Азизнинг ҳам ўзига яраша характери бор. Ҳаммасини олдинда айтиб, мен қандоқ чидаган бўлсам, сиз ҳам шундай чидамли бўласиз, дедим. Катта келинимга ҳам ҳаммасини бошида айтганман. Ҳозир мендан ҳам ўтиб кетган», – дейди Саида Раметова.
«Мен шундай яхши оила, инсоннинг обрўсини, ҳурматини сақлаб қоладиган, иложи бўлса оширадиган келин бўлишга ҳаракат қилишим керак. Саида Раметова ойижоним ролларидан 180 даражага фарқ қилади. Жуда ҳам яхши, меҳрибон, битта тариф бериш керак бўлса, бриллиант, тилла ҳам эмас, бриллиант аёллар», – дейди Раметовлар оиласининг янги келини.
Изоҳ (0)