2022-yil 3-mart kuni poytaxtdagi muhtasham restoranlarning birida aktyor va rejissor Aziz Rametovning nikoh oqshomi bo‘lib o‘tdi. Bu yil 34 yoshni qarshilagan aktyor Shahloxon Umarova ismli qizga uylandi. Juftlik Milliy TV kanalining “Baxtlimiz” ko‘rsatuvi bergan intervyusida qanday qilib tanishgani haqida so‘zlab berdi.
“Men Umarova Shahlo – 1993-yilda Surxondaryo viloyati Denov tumanida tug‘ilganman. 28 yoshdaman. Oilada ikkita farzandmiz, ukam va men. Aziz akani klip va kinolarda ko‘rganman. “Meni kechir” ko‘rsatuvida bir qiziq voqea bo‘lgan, faqat o‘zlariga aytmaganman. Oyilaridan kechirim so‘rab, juda ham chiroyli ko‘rsatuv tayyorlangan. O‘sha vaqtda uydagilarga aytganman, men shu bolaga turmushga chiqaman, ko‘rasizlar, deb. Shunchaki, o‘sha paytda rostdan ham yoqib ketganlar. Oyim ustimdan kulganlar. Orzuga ayb yo‘q, deganman. Inson sifatida ko‘proq yaxshi xotira berganlar. “Arslon izidan” filmini tushunish uchun 10—12 marta ko‘rib chiqqanman. U paytlarda his-tuyg‘u bo‘lmagan, shunchaki tomoshabin sifatida ijodlarini, iste’dodlarini hurmat qilganman”, — deydi Shahlo Umarova.
“Oila – bu mas’uliyat. Men bu mas’uliyatdan juda qo‘rqaman. Boshqasi berilsa, ko‘tararman, lekin oilanikidan qo‘rqaman. Mish-mishlar bo‘ladi-da, bo‘lgani yaxshi. Sevgan qizim turmushga chiqqani bu yolg‘on. Men agar rostan sevsam, birovga berib qo‘yadigan bola emasman”, — deydi aktyor Aziz Rametov.
Aktrisa Saida Rametova Surxondaryodan kelin qilgani haqida shunday deydi:
“Biz mana Toshkentda yashaymiz. Lekin o‘zim samarqandlik, xo‘jayin turkistonlik. Xudoga shukr, butun respublika, viloyat birlashyapmiz, quda-andachilik bo‘lyapti. O‘zimga aytamanda, baxtli onaman, baxtli qaynonaman. Ko‘pchilik agar qizimni olsangiz, jon deb beraman, avval Azizjon uchun, keyin siz uchun. Chunki siz yaxshi qaynonasizda, deyishadi. Men bundan xursand bo‘laman. Yaqin-yaqindayam teatrimizga kelib, qizlarni rasmini ko‘rsatishar edi. Men jon deb kelin qilaman, lekin gap o‘g‘limda-da, yashaydigan o‘g‘lim, deyman”.
Shahlo Umarovaning aytishicha, Aziz Rametov bilan ilk marta Instagram orqali tanishgan.
“Tanishuvimiz Instagram orqali bo‘ldi. Yozishdik, gaplashdik meni soham bo‘yicha. Keyin ko‘rishganda, oyilarini nomi bilan brend mahsulot chiqarishini aytdilar. Birga ishladik, xarakterlari, insoniyligi, Aziz akada juda ham mehribonchilik kuchli, samimiylar. Shularni hurmat qilib, ko‘nglim tushgan”, – deydi Shahlo.
Aziz Rametov esa ilk tanishuvni quyidagicha ta’riflaydi:
“Suhbat suhbatga ulandi. Menga Instagram’da reklama qo‘ydirdilar, men ularga murojaat qildim. Ochig‘ini aytaman, barakali pul kirdi undan. ‘Onamga “Saida Collection” brendi ostida ro‘mol va sharflar chiqaryapmiz. Siz shu toshdan chiroyli qilib yozib bering’, – dedim. Keyin Shahlo ham reklama qilib berishimni iltimos qildilar. Reklamani puli, uyat bo‘lsa ham aytaman, juda barakali bo‘ldi. O‘zi ko‘p pul emas, lekin barakali bo‘ldi. Ko‘p pul ishlataman, barakasi bo‘lmagan. ‘Onam, balki shu qiz kelin bo‘lar’, – dedilar. Balki turmushga chiqqandir deb o‘ylab, bu masalani onamning o‘ziga topshirdim. Shu tarzda bir yil do‘stlashdik, ko‘nglimni ovladilar”.
Saida Rametovaning so‘zlariga ko‘ra Shahlo Nastarin taxallusi bilan ijod qiladi. Uning qo‘li gul, ko‘p san’atkor ayollar bilan ham hamkorlikda ishlagan. Saida Rametova ham o‘zi narsalar buyurgan. Aktrisaning katta kelini bilan ham birga ishlagan. O‘sha vaqtdayoq qizning odobi, axloqi, muomalasi aktrisaga ma’qul kelgan bo‘lsa-da, lekin kelin qilish xayoliga ham kelmagan.
“Men bilmayman, hali yashab ko‘rmaganman. Lekin aktyor sifatida aytyapman, uylanib qo‘yib, nima qilding, degan kishidek emas. Ayol kishi sevsa, juda yomon sevadi, qattiq sevadi. Do‘stlik bo‘lsa, keyin sevgi bo‘lsa, ana o‘sha ayol qiynalmaydi. Muhabbat, sevib qoldingmi, o‘rtasini ol do‘stim. Muhabbatga ko‘p kirib ketilsa, qaramlik bo‘ladi. Ertaga uni ko‘rolmay qolish mumkin, ishda bo‘lar, menga e’tibor bermayapti deb, xiyonat boshlanadi. Shuning uchun har bir narsani o‘rtasini olish kerak. Qizlarning erkin davri yaxshi ko‘rganiga turmushga chiqadigan davri. Avvalgi zamon emas hozir”, – deydi aktyor.
Shahlo ko‘rsatuvda ilk marta yuzidagi bezagini nima maqsadda taqqani haqida ham so‘zlab berdi.
“Uyimda hech kim qarshilik bildirmagan. Tanlovimni hurmat qilishgan. Aziz akani tanigan vaqtimdan bilganman, rashk qilish yoqmaydi. O‘zimni bu narsaga ko‘niktirganman. Sovchi kelganida, istihora namozini o‘qiganman. Buvim shundan keyin alohida tushuntirdilar: ‘Qizim, Aziz chiroyli bola, oshig‘i mingta. Ertaga yashab ketishing uchun sabrli bo‘lishing kerak. Rashk qilish kerak emas. Rashk er-xotinning eng katta urushiga sabab bo‘lishi mumkin. Rashk qilishingdan oldin o‘ylab ko‘r, o‘sha insondan butunlay keta olishingga aqling yetadimi? Yoki shunday qilib orani uzib ketishing kerak. Agar u inson senga kerak bo‘lsa, qadrli bo‘lsa, hech qachon rashk qilmaysan. Ichingga yutasan, sabr qilasan, Allohdan so‘raysan. Agar ayol o‘ziga ishonsa, eriga kerakligini his qilsa, menimcha rashk qilmaydi”, – deya qo‘shimcha qildi Shahlo.
“San’atkorga rafiqa bo‘lish, san’atkorga kelin bo‘lish haqiqatan ham oson emas. Azizning ham o‘ziga yarasha xarakteri bor. Hammasini oldinda aytib, men qandoq chidagan bo‘lsam, siz ham shunday chidamli bo‘lasiz, dedim. Katta kelinimga ham hammasini boshida aytganman. Hozir mendan ham o‘tib ketgan”, – deydi Saida Rametova.
“Men shunday yaxshi oila, insonning obro‘sini, hurmatini saqlab qoladigan, iloji bo‘lsa oshiradigan kelin bo‘lishga harakat qilishim kerak. Saida Rametova oyijonim rollaridan 180 darajaga farq qiladi. Juda ham yaxshi, mehribon, bitta tarif berish kerak bo‘lsa, brilliant, tilla ham emas, brilliant ayollar”, – deydi Rametovlar oilasining yangi kelini.
Izoh (0)