Саҳнани қўриқлаётган Ҳалима ва Мансур Агалиевнинг кўз ёшлари. Юлдуз Усмонованинг концертидан репортаж (видео)

Ўзбекистон халқ артисти Юлдуз Усмонованинг бу йилги концерт дастури 10—25 март кунлари «Халқлар дўстлиги» санъат саройида бўлиб ўтади. «Дарё» мухбирлари концерт дастуридан репортаж тайёрлади. Видеода концерт олди тайёргарлик жараёнлари, саҳна ортидаги югур-югурлар ва ижодий жамоанинг қандай ишлашига гувоҳ бўлишингиз мумкин.

Режа бўйича бу йилги концертда 21 та қўшиқ ижро этилиши керак эди. Аммо Юлдуз Усмонова мухлисларнинг илтимосига кўра дастур сўнгида «Майли, жоним» ва «Муҳаббат» қўшиқларини такроран ижро этди.

Хонанда навбатдаги концерт дастурида Ботир Қодиров ва ёш ижодкор Малик билан дуэт тароналарни куйлади. «Ёр, биё» ва «Кел, кел» дуэтларини мухлислар илиқ қарши олди.

Анъанага мувофиқ хонанда бу йилги дастурида ҳам «Наврўз» рақс ансамбли билан ҳамкорлик қилди. Aнсaмблнинг беш нафар ёш раққосалари хонанда эътиборига тушгани учун уларни халққа таништирди.

«Наврўз» рақс ансамбли раҳбари Зарина Аҳмедова хонанда томонидан басталанган «Aвангард» мусиқасига ноодатий рақсга тушди.

Дастурга қизиқчи Шукрулло Исроилов бошловчилик қилди.

Бошқа концертлардан фарқли равишда Юлдуз Усмонованинг дастурида «Халқлар дўстлиги» санъат саройидаги интерьер унинг ташаббуси билан бинафша рангга бурканган.

Баъзи қўшиқлар тингловчиларни ўйлашга мажбур қилган бўлса, айримлар мириқиб рақс тушишларига сабаб бўлди. Дастур аввалда хонанда ҳам мухлисларига тортинмай рақс тушишларини таъкидлади.

Хонанда нақд 10 дақиқа давомида мухлислар келтирган гулдасталарни қабул қилди. Юлдуз гулларни олиш чоғида, лолани ўзгача яхши кўришини айтди.

Концерт дастури сўнгида Юлдуз Усмонова имконияти чекланган кичик мухлисаси билан учрашиб, унинг орзусини рўёбга чиқарди. Қизалоққа Аллоҳдан шифо тилаб, уни дуо қилди. Қизчанинг онаси Юлдуз Усмонова оиланинг илтимосини ерда қолдирмай, улар билан учрашишга рози бўлганидан таъсирланиб, йиғлади. Ушбу манзара примадонна турмуш ўртоғи ҳамда продюсери Мансур Агалиевни ҳам таъсирлантириб юборди.

Концертдан тўлиқ репортажни қуйида томоша қилишингиз мумкин.

Мавзуга доир:

• Юлдуз Усмонованинг бу йилги концерти қандай ўтади? Якуний репетиция жараёнидан репортаж (видео)
• «Юлдуз Усмонова билан бирга юриш — фақат ресторанда бирга ўтириш дегани эмас». Ҳалима Юлдуз Усмонова жамоасидаги ўрни ҳақида (видео)
• Юлдуз Усмонова май ойида ҳам 5 кунлик концерт беради. Унда Обид Асомов ва Руслан Шарипов «жонлантирилиши» кутилмоқда (видео)