«Ўзгидромет» ҳафта давомида кузатиладиган об-ҳаво ҳақида маълумот берди.
Қайд этилишича, 14—17 март кунлари республика бўйича беқарор об-ҳаво сақланиб туради. Вилоятлар бўйлаб вақти-вақти билан ёмғир ёғади, 14—16 март кунлари баъзи жойларда кучли ёмғир ёғиши ва момақалдироқ бўлиши мумкин.
Қорақалпоғистонда, Хоразм вилоятида 14 мартда ва 16—17 март кунлари баъзи жойларда асосан кам миқдорда ёғингарчилик (ёмғир, қор) бўлади.
Ҳафтанинг биринчи ярмида кундуз кунги ҳарорат 14-17 даража илиқдан 8-11 даража илиққача ўзгариб туради, чоршанба куни 16-21 даража илиққача кўтарилади.
18 март жума куни Ўзбекистон ҳудудига Россиянинг Европа қисмидан совуқ ҳаво массаси кириб келади. Республика бўйича ёмғир ёғади, айрим жойларда ёмғир қисқа муддатга қорга айланиши эҳтимоли бор. Кундуз куни ҳаво ҳарорати 7-10 даража илиққача пасаяди.
Ҳафта давомида республика бўйича баъзи жойларда шамол 17-22 метр/секундгача кучаяди, момақалдироқ пайтида шамол кучайиши 25-28 метр/секундгача етиши мумкин.
Республиканинг тоғолди ва тоғли ҳудудларида ёғингарчилик ёмғир ва қор кўринишида бўлади, 14—16 мартда баъзи жойларда кучли бўлади.
Тоғолди ва тоғли ҳудудларда сел келиши, тоғларда қор кўчиши хавфи бор.
Изоҳ (0)