Покистон Ўзбекистонга мол гўшти етказиб беришни бошлади

Покистон Ўзбекистонга 40 минг долларлик гўштнинг биринчи партияси (18 тонна) Тошкентга шу ҳафта етиб келади. Март ойида яна 50 та контейнерда гўшт (жами 900 тонна) жўнатилиши кутилмоқда. Бу ҳақда Telegram’даги «Нигоҳ» канали хабар берди.

Покистоннинг Shaheen компанияси раҳбари Малик Шер Хоннинг таъкидлашича, Покистон имтиёзли савдо тўғрисидаги шартномалар тузилганидан кейин Ўзбекистон бозорига диққат билан қарай бошлаган.

Эслатиб ўтамиз, 2021 йилнинг октябрида Сенат Ўзбекистонда гўшт ва картошка импортини ҚҚСдан озод қилишни маъқуллаганди. Бюджет ва иқтисодий ислоҳотлар масалалари қўмитаси раиси Эркин Гадоев аҳолининг чорвачилик маҳсулотларига бўлган эҳтиёжини қондириш учун тиббиёт нормаларга кўра, 1,5 миллион тонна гўшт, яъни ҳар бир киши учун йилига 42,8 килограмм гўшт талаб этилишини, 2021 йилда 1,4 миллион тонна гўшт ишлаб чиқариш режалаштирилгани, бу 2020 йилга нисбатан 4 фоизга кўплигини айтганди.

«Бу миқдор аҳоли истеъмоли талабининг 93 фоизига тенг. Демак, эҳтиёжнинг қолган қисми импорт гўшт ҳисобидан қопланиши керак», — деган эди у.

4 март куни Ўзбекистон ва Покистон ўртасида имтиёзли савдо тўғрисидаги битим имзоланган эди. Шавкат Мирзиёев ва Покистон бош вазири Имрон Хон товар айирбошлаш ҳажмини 500 миллион долларга етказиш имконияти борлигини таъкидлаб, Трансафғон темир йўлини янада ривожлантиришга келишиб олган эди.

Таъкидланишича, Ўзбекистон бир неча йиллардан буён транспорт йўналишларини диверсификация қилиш ва минтақавий алоқаларни ривожлантириш чораларини кўрмоқда. Шавкат Мирзиёевнинг сўзларига кўра, Термиз—Мозори Шариф—Кобул—Пешовар темир йўл қурилиши Покистонни Марказий Осиё билан боғлайдиган, Ўзбекистонни Карачи, Гвадар ва Қосим портларига олиб чиқадиган энг яқин, арзон ва хавфсиз йўлак яратади.

Бундан ташқари, 2021 йил ноябрь ойида Ўзбекистондан биринчи транзит юк Покистонга етиб борган эди. Покистон томони буни «ҳамкорликнинг янги даврининг бошланиши» деб баҳолаганди. Кўп ўтмай Покистон Ўзбекистондан юк ташувчилар учун божхона тартиб-таомилларини соддалаштирган — юк машиналари кириш тўлови бўйича депозит тўламасдан мамлакатга кириши мумкин.