Бухорода ногирон фарзандининг моддий таъминоти учун тўланиши лозим бўлган 111 миллион сўм алимент пулини тўламай, бўйин товлаб юрган она 15 суткага қамалди. Бу ҳақда «Дарё»га Ғиждувон туман суди судьяси Бобораҳим Очилов хабар берди.
Маълум бўлишича, вилоятнинг Ғиждувон туманида яшовчи 53 ёшли фуқаро Л.К. 2006 йилда туғилган ногирон фарзандидан воз кечган. Жисмоний ривожланишида нуқсони бор, туғма ногирон ва никоҳсиз туғилган бола олдида оналик мажбуриятларини бажармаган Л.К. суд қарори билан оналик ҳуқуқидан маҳрум қилиниб, бола фойдасига алимент ундирилиши белгиланган.Фуқаролик ишлари бўйича Бухоро шаҳар судининг 2010 йил 17 майдаги ижро ҳужжатига асосан, аёл фарзанди таъминоти учун алимент тўлаши белгиланган. Бироқ ўтган йиллар давомида алимент тўланмагач, қарздор онанинг алиментдан қарзи 111 миллион 248 минг 852 сўмга етган.
Жиноят ишлари бўйича Ғиждувон туман суди 2022 йил 10 март куни мазкур ишни кўриб чиқиб, алиментдан қарздор онага 15 сутка маъмурий қамоқ жазосини қўллаган.
Изоҳ (0)