Buxoroda xorijdan olib kelingan 5,2 mlrd so‘mlik dori vositalarining noqonuniy kiritilishiga chek qo‘yildi

Buxoroda yuk avtomashinasi orqali qo‘shni davlatdan 5,2 milliard so‘mlik dori vositalarini noqonuniy olib kirishga uringan haydovchi qo‘lga olindi. Bu haqda “Daryo”ga viloyat Bojxona boshqarmasi axborot xizmati rahbari Javohir Ismoilov xabar berdi.

Ta’kidlanishicha, 2022-yilning 11-mart kuni viloyat Bojxona boshqarmasi xodimlari tomonidan “Olot” chegara bojxona postida qo‘shni davlatdan kirib kelayotgan yuk avtomashinalari belgilangan tartibda ko‘rikdan o‘tkazilgan. Buxoro shahrida yashovchi fuqaro Z.R. ko‘rik davomida o‘z boshqaruvidagi avtomashinasi va undagi yuklarning barcha hujjatlarga muvofiqligini ko‘rsatishga va bojxona xodimlarni chalg‘itishga uringan. Haydovchining sarosimada ekani nazoratchilarni yanada shubhalantirgan. Xolislar ishtirokida bojxona ko‘rigidan o‘tkazilgan avtomashinada yuk kuzatuv hujjatlarida ko‘rsatilmagan va ko‘rsatilganidan ortiqcha bo‘lgan umumiy qiymati 5,2 milliard so‘mlik qimmatbaho dori vositalari borligi ma’lum bo‘lgan. Dori vositalari qo‘shni davlatlarda ishlab chiqarilgani va O‘zbekiston hududiga noqonuniy olib kirilayotgani aniqlangan.

“Xuddi shu kuni mazkur bojxona postiga qo‘shni davlatdan kirib kelgan ikkinchi yuk avtomashinasi ham ko‘rikdan o‘tkazilganda unda kuzatuv hujjatlarida ko‘rsatilmagan, umumiy qiymati 1,7 milliard so‘mlik alyumin folgalari tovarlari borligi aniqlandi. Hozirda har ikki holat yuzasidan bojxona organlari tomonidan surishtiruv harakatlari davom ettirilmoqda”, — deydi Javohir Ismoilov.