Самарқанд вилоятининг Нарпай туманида хизмат вазифасини бажараётган ЙПХ ходимини ҳақорат қилиб, унинг фаолиятига тўсқинлик қилган ҳайдовчининг шахси аниқланди, деб хабар беради вилояти ИИБ матбуот хизмати.
Маълум қилинишича, Самарқанд вилояти ИИБ ЙҲХБ ЙПХ отряди Мобил қурилмалардан фойдаланиш гуруҳи ҳайдовчи-оператори 20 февраль куни тасдиқланган тақсимотга асосан Нарпай тумани ҳудудида мультирадар ўрнатилган автомобилда ўз вазифасини баражаётган бўлган.
Номаълум транспорт воситаси ҳайдовчиси унинг олдига келиб, ҳеч бир сабабсиз хизмат вазифасини бажараётган ИИО ходимига нисбатан қўпол муносабатда бўлиб, уни ҳақорат қилган.
Мазкур ҳолат юзасидан ИИВ Шахсий хавфсизлиги бош бошқармаси Самарқанд вилояти бошқармаси томонидан ўрганиш ишлари олиб борилган. Ўрганишлар давомида ушбу шахс Нарпай тумани «Қорахитой» қишлоғида яшовчи 28 ёшли фуқаро экани ва у ҳолатни тасвирга олиб, интернетга жойлаштиргани аниқланган.
Тўпланган ҳужжатлар жиноят ишлари бўйича Нарпай туман судида кўриб чиқилган. Суд қарорига кўра, ушбу фуқаро Маъмурий жавобгарлик тўғрисидаги кодекснинг 195-моддасида (ички ишлар органлари ходимларининг ўз хизмат бурчларини бажаришларига қаршилик кўрсатиш) назарда тутилган ҳуқуқбузарликни содир этган деб топилган ва 10 сутка маъмурий қамоқ жазоси тайинланган. Шунингдек, фуқарони қамоқда сақлаш билан боғлиқ харажат учун ҳар бир куни БҲМнинг 15 фоизи миқдорида, яъни 405 минг сўм давлат даромадига пул ундирилади.
Бундан ташқари, фуқаро давлат органи ходимининг шаънига путур етказувчи сўзлар айтгани ва ИИО ходимини ҳақорат қилгани юзасидан тўпланган ҳужжатлар прокуратурага юборилган, ҳолат юзасидан қўшимча текширув ҳаракатлари олиб борилмоқда.
Аввалроқ Қашқадарёда ЙПХ ходимлари билан жанжаллашган ҳайдовчи 14 суткага қамалгани, Самарқандда ҳайдовчининг телефонини тортиб олишга уринган ЙҲХБ ходимига хизмат текшируви тайинлангани тўғрисида хабар берилганди.
Мавзуга доир:
Изоҳ (0)