Андижон, Сурхондарё, Қашқадарё, Самарқанд, Тошкент ҳамда Хоразм вилояти ҳокимларига янги ўринбосарлар — вилоят оила ва хотин-қизлар бошқармаси бошлиқлари тайинланди. Бу ҳақда «Дарё» мухбирлари хабар берди.
«Дарё»нинг Андижон вилоятидаги мухбири Умиджон Мамарасуловнинг маълумот беришича, Андижон вилояти ҳокими ўринбосари — вилоят оила ва хотин-қизлар бошқармаси бошлиғи лавозимини Гулнора Абдуллаева эгалланган.
Гулнора Абдуллаева тайинловга қадар вилоят касаба уюшмалари ташкилотлари бирлашмаси раисининг ўринбосари лавозимида фаолият юритиб келган. У Избоскан туманида туғилган бўлиб, 1989 йил Тошкент давлат университетини, 2008 йилда эса Ўзбекистон Республикаси Президенти ҳузуридаги давлат ва жамият қурилиши академиясини тугатган.
Сурхондарё вилояти ҳокимлиги ахборот хизмати раҳбари Муродбек Давлатовнинг «Дарё»га маълумот беришича, Тўра Боболовнинг янги ўринбосари сифатида айни кунга қадар Маҳалла ва оилани қўллаб-қувватлаш бошқармаси бошлиғининг биринчи ўринбосари лавозимида ишлаб келаган Зулхумор Хидирова иш бошлаган.
У 1968 йил Шўрчи туманида туғилган бўлиб, 1992 йили ҳозирги Термиз давлат университетини тамомлаган. Мутахассислиги бўйича ўқитувчи бўлган Зулхумор Хидирова меҳнат фаолиятини Қумқўрғон туманидаги «Юлдузча» болалар боғчаси тарбиячиси вазифасидан бошлаган бўлиб, сўнгра мактаб ўқитувчиси, мактаб директори ўринбосари, ҳоким ўринбосари лавозимларида фаолият юритган.
Қашқадарё вилояти ҳокимлиги ахборот хизмати раҳбари Аҳрор Содиқовнинг «Дарё»га хабар беришича, Муроджон Азимовнинг янги ўринбосари сифатида жамоатчиликка Комила Каромова таништирилган. Комила Каромова мазкур лавозимга қадар вилоят маҳалла ва оилани қўллаб-қувватлаш бошқармаси бошлиғининг биринчи ўринбосари сифатида ишлаб келган.
Хоразм вилояти ҳокимлиги ахборот хизмати раҳбари Одилбек Адамбаевнинг маълумот беришича, вилоят ҳокими ўринбосарлигига тайинловга қадар вилоят маҳалла ва оилани қўллаб-қувватлаш бошқармаси бошлиғининг биринчи ўринбосари лавозимида фаолият юритиб келган Гулсара Курбанбаева тайинланган.
Тошкент вилояти ҳокимлиги ахборот хизматининг ёзишича, Зоир Мирзаевнинг янги ўринбосари сифатида унинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида ишлаб келаётган Зуҳра Миргазиева тайинланган бўлса, Самарқанд вилояти ҳокими Эркинжон Турдимовнинг янги ўринбосари сифатида Зебинисо Раҳманова иш бошлаган.
Изоҳ (0)