Еврокомиссия Европа иттифоқи мамлакатларига 2030 йилгача Россиядан олинадиган ёқилғи маҳсулотларини рад этиш режасини таклиф этди. Бу ҳақда комиссиянинг пресс-релизида хабар қилинган.
Қарор Украинада давом этаётган уруш туфайли қабул қилинди, дейилади хабарда. Биринчи навбатда Россиядан импорт қилинадиган газдан воз кечиш режалаштирилмоқда.
Европанинг Россия газига қарамлигини қисқартиришнинг энг биринчи чоралари — газ етказиб берилишини диверсификация қилиш, биометан ҳамда қайта ишланадиган водород ишлаб чиқаришни ошириш бўлади.
Шунингдек, Еврокомиссия биноларнинг иситиш тизимларида газдан фойдаланишни энергия самарадорлигини ошириш ва қайта ишланадиган энергия манбалари ҳисобига тезлаштиришни таклиф қилган. Қайд этилишича, барча чора-тадбирлар EИнинг 2022 йилнинг қолган қисмида Россия газидан фойдаланиш ҳажмини камайтиради.
Бундан ташқари, режа лойиҳасида Европадаги энергия етказувчиларининг нархи ошишига қарши бир қатор чоралар ва келаси қишга зарур захирани тўплаш масаласи кўтарилган. Жумладан, Еврокомиссия ҳар йили 1 октябрда EИ газ сақлаш жойлари камида 90 фоизини тўлдириш юзасидан қонун ҳужжатини ишлаб чиқиш ташаббусини билдирган.
Украинадаги уруш фонида Ғарб мамлакатлари Россияга нисбатан кескин санкциялар қўллади. Россия углеводородларига нисбатан чекловлар Европага етказилаётган энергия ресурслари сабаб биринчилардан бўлиб эълон қилинмаган.
8 март куни АҚШ Россияга нисбатан санкцияларини яна кучайтирди ва мамлакатдан нефть ҳамда газ импорт қилишни тақиқлади. Буюк Британия ҳам шундай қарорга келган ва 2022 йил охирида Россия нефть-газидан тўлиқ воз кечмоқчи. Бундан аввал Германия ва Нидерландия Россия энергия ресурсларига нисбатан эмбарго қўллаш таклифи билан чиққанди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)