Буюк Британия Мудофаа вазирлиги Бирлашган Қироллик ҳарбий хизматчиларига рухсатсиз Украина ҳудудига боришни тақиқлади, деб хабар беради The Independent газетаси.
«Барча ҳарбий хизматчиларга кейинги кўрсатма бўлмагунига қадар Украинага бориш тақиқланади», — дейди Мудофаа вазирлиги вакили.
Мамлакат мудофаа идорасининг баёнотида қайд этилишича, Украинага йўл олган ҳарбий хизматчилар интизомий ва маъмурий жавобгарликка тортилади. Мазкур қоида ҳозирда хизматдан бўшатилган ходимларга ҳам тааллуқли.
Буюк Британия Мудофаа вазирлиги олдин ҳам ҳарбий хизматчиларини ўзбошимчалик билан Украинага бормаслик ҳақида огоҳлантирган эди. Идора Британия аскарларининг Украинада пайдо бўлиши можаронинг янада жиддий тус олишига олиб келиши ва Россия томонидан қаттиқ жавоб чораси кўрилиши мумкинлигидан хавотирда.
Аввалроқ Буюк Британия бош вазири Борис Жонсон Украинадаги воқеалар муносабати билан Москвага босимни кучайтириш мақсадида режа ишлаб чиққани тўғрисида хабар берилганди. Бош вазир офисига кўра, Москва Украинага қарши ҳаракатларида «муваффақиятсизликка учраши ва бу яққол кўриниб туриши керак», бунинг учун эса Россияга максимал даражада зарар етказишга қаратилган саъй-ҳаракатларни кучайтириш зарур.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)