Россия Марказий банки россияликларнинг хорижий валютадаги ҳисоб рақамларидан нақд пул беришни вақтинча чеклади. Бу ҳақда регулятор сайтида маълум қилинди.
Россия банклари мижозлари ўз ҳисоб рақамлари ёки омонатларидан 10 минг долларгача нақд пул еча олади. Қолган маблағлар пул олинган кундаги бозор курси бўйича рублда берилади.
«Мазкур вақтинчалик муддат давомида валюта ҳисоб рақамидан қатъи назар АҚШ долларида берилади. Қолган валюталарни АҚШ долларига конвертация қилиш шу кунги бозор курсида амалга оширилади», — дейилади хабарда.
Марказий банкнинг таъкидлашича, Россия фуқаролари хорижий валюталарда ҳисоб рақамлари ва омонатларни сақлашда давом этишлари мумкин бўлади, уларнинг шартлари ўзгармайди. Хорижий валютадаги янги ҳисоб рақамларини очишга ҳам рухсат берилган.
Чекловлар 9 мартдан кучга кирган бўлиб, 9 сентябрга қадар амалда бўлади.
Эслатиб ўтамиз, Россия 24 февралда Украинада махсус ҳарбий операция бошлаган, икки давлат ўртасидаги урушнинг 13-куни давом этмоқда. 2 март куни Владимир Путин Россия ҳудудидан 10 минг доллардан ортиқ валюта олиб чиқиб кетишни тақиқлаш тўғрисидаги фармонни имзолаганди. Мазкур фармон «АҚШ ҳамда унга қўшилган хорижий давлатлар ҳамда халқаро ташкилотларнинг Россияга қарши санкциялар қўллаш билан боғлиқ дўстона бўлмаган ва халқаро ҳуқуққа зид ҳаракатлари муносабати билан» имзоланган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)