Россияда АПЛ ва Англия Кубоги ўйинлари трансляцияси тўхтатилиши мумкин. Инглиз клублари буни қўллаб-қувватлаган

Англия Премьер Лигаси трансляцияларини Россияда тўхтатиш қарорига инглиз клублари эътироз билдирмайди, дея хабар қилмоқда Sky Sports.

Премьер Лига ва Англия Футбол Лигаси (EFL) вакиллари тез орада мусобақаларни Россияда трансляция қилинишини тўхтатиши айтилмоқда.

АПЛ ва EFL раҳбарлари адвокатларга Россия Федерацияси ҳудудида трансляция бўйича шартномаларни бекор қилиш жараёнини бошлаш ҳақида кўрсатма берган.

Премьер Лига Россияда чемпионат ўйинларини трансляция қилиш орқали йилига 6 миллион фунтга яқин даромад қилади.

Россия бозоридан чекиниш туфайли даромад пасайишига қарамай, барча инглиз клублари Премьер Лига ва EFL’нинг ушбу қарорини қўллаб-қувватлаган.

Ҳозирда Okko платформаси Россияда АПЛ ўйинларини намойиш этади. «Матч-ТВ» канали эса Англия Кубоги баҳсларини трансляция қилади.

Аввалроқ Халқаро бокс ассоциацияси (IBА) россиялик ва беларусликлар боксчиларга халқаро мусобақаларда қатнашишни тақиқлаганди, Бутунжаҳон бокс ташкилоти (WBO), Халқаро бокс федерацияси (IBF), Бутунжаҳон бокс кенгаши (WBC), Бутунжаҳон бокс ассоциацияси (WBA) Украинадаги вазият туфайли Россиядаги жангларни тан олмаслигини маълум қилганди. ФИФА Россия футбол терма жамоасини ЖЧ—2022 ўтиш ўйинларидан, УЕФА эса рус клубларини Еврокубоклардан четлатган эди.