ФИФА Россия чемпионатида тўп сурувчи легионерларга клуб билан шартномасини бекор қилишга рухсат берди.
Россияда чемпионатида фаолият олиб борувчи хорижлик футболчи ва мураббийлар энди мавсум сўнгига қадар шартномани бир томонлама тўхтатиш ҳуқуқидан фойдаланиши мумкин. Ундан ташқари эркин агент сифатида янги клублар билан 30 июнга қадар ҳеч қандай муаммоларсиз шартнома имзолаши мумкин.
Клубларга трансфер ойнаси ёпиқ бўлса ҳам Россиядан келган футболчиларни рўйхатдан ўтказишига рухсат берилди. Рўйхатдан ўтказишнинг охирги муддати — 7 апрель.
Бу қарор УЕФАнинг розилиги билан қабул қилинган. Агар 10 мартга қадар футболчи ва клублар ўзаро келишувга эриша олмаса, шартномани бир томонлама тўхтатиб туриш варианти тақдим этилади.
Шу билан бирга, Россиядан ташриф буюрувчи футболчилар билан шартнома имзоламоқчи бўлган клубларга икки нафардан ортиқ футболчини рўйхатдан ўтказиш тақиқланади.
Украина Премьер Лигаси легионерларининг эса клублари билан шартномаси автоматик равишда тўхтатилади.
Аввалроқ ФИФА Россия футбол терма жамоасини ЖЧ—2022 ўтиш ўйинларидан, УЕФА эса рус клубларини Еврокубоклардан четлатган эди.
24 февраль куни Россия президенти Владимир Путин Донбассда «махсус ҳарбий операция» бошланганини эълон қилди. Айни вақтда Украинанинг қатор ҳудудларида ҳарбий ҳаракатлар давом этмоқда.
Изоҳ (0)