«ПСЖ» Килиан Мбаппега футбол тарихидаги энг катта шартнома таклиф қилгани айтилмоқда

«ПСЖ» Килиан Мбаппега футбол тарихидаги энг даромадли шартномани таклиф қилди.

The Independent хабарига кўра, парижликлар ҳужумчига йилига 100 миллион евролик шартнома таклиф қилган.

Қайд этилишича, футболчига асосий даъвогар бўлиб турган «Реал» бу ҳақида хабар топган, аммо унга бундай таклиф билан чиқа олмайди. Мадридликлар Килианни клубнинг бой тарихи ҳамда келажаги ўзига жалб этишига умид қилмоқда.

Аввлароқ «ПСЖ» Мбаппега 50 миллион евро маош ва яна садоқат учун қўшимча 100 миллион евро бонус билан янги шартнома таклиф қилгани ҳақида хабар берилганди.

Бунгача Килиан «ПСЖ» тарихида энг яхши тўпурарга айланиш учун клубда қолиши мумкинлиги хабар қилинганди. Шунингдек, Франциянинг амалдаги ва собиқ президентлари ҳам Килиан Мбаппега «ПСЖ»да қолишни маслаҳат берганди.

Маълумот учун, 2021/22 йилги мавсумда Мбаппе барча мусобақаларда 34 та ўйинда иштирок этиб, 24 та гол ва 17 та голли узатма муаллифига айланган.

23 ёшли Мбаппе 2017 йилда «Монако»дан «ПСЖ»га ижара асосида ўтган эди. 2018 йилда парижликлар 145 миллион еврога футболчини тўлиқ сотиб олган. Мбаппенинг «ПСЖ» билан амалдаги шартномаси 2022 йил ёзида ўз ниҳоясига етади. Аввалроқ бир неча маротаба ҳужумчининг «Реал»га ўтиши ҳақида хабарлар янграганди.