БМТнинг озиқ-овқат ва қишлоқ хўжалиги ташкилоти (FAO) маълумотларига кўра, жаҳон озиқ-овқат нархларининг кўрсаткичи февраль ойида кўтарилиб, ўсимлик мойлари ва сут маҳсулотлари бўйича рекорд даражага етди.
FAO озиқ-овқат нархлари индекси февраль ойида ўртача 140,7 пунктни ташкил этди. Бу январь ойига нисбатан 3,9 фоизга, ўтган йилнинг шу ойига нисбатан эса 20,7 фоизга юқори. FAO индекси озиқ-овқат маҳсулотларининг халқаро нархлари билан бўладиган ойлик ўзгаришларни кузатиб боради.
Сут маҳсулотлари эса февралда январь ойига нисбатан ўртача 6,4 фоизга юқори бўлди. Бу Ғарбий Европа ва Океанияда сут етказиб беришнинг кутилганидан пастлиги ва доимий импорт талаби билан боғлиқлиги айтилмоқда.
Дунё бўйлаб гўшт нархлари январга қарганда 1,1 фоизга ўсди. Мол гўшти котировкалари кучли глобал импорт талаби, Бразилияда сўйишга тайёр қорамолларнинг чекланган таъминоти ва Австралияда қўйилган чекловлар сабабли янги рекорд даражага етди.
Шакар нархлари Ҳиндистон ва Таиланд каби йирик экспорт қилувчи мамлакатларда ишлаб чиқариш ошаётганлиги туфайли 1,9 фоизга камайди. Февраль ойидаги нархларнинг ўсиши қисман Украинадаги уруш билан ҳам бўглиқ бўлди. Қайд этилишича, Жаҳон буғдой ва маккажўхори ишлаб чиқариш ҳажми 2022 йилда ўсади.
2021—2022 йилларда глобал дондан фойдаланиш ҳозирда 2,8 млн тоннани ташкил этади. Бу йиллик 1,5 фоизга ўсишдир. 2022 йилда тугайдиган глобал дон захиралари йил давомида бир оз ўсиб, 836 млн тоннагача етиши кутилмоқда.
Ўзбекистонда аҳвол қандай?
Кетма-кет иккинчи ой мева-сабзавотлар нарх ошиши бўйича етакчилик қилди. Январь ойига нисбатан мева ва ёнғоқлар нархлари 2 фоизга ошган бўлса, балиқ ва бошқа денгиз маҳсулотлари 0,3 фоизга қимматлашди.
Сабзавотлар ва дуккаклилар нархи 2,1 фоизга кўтарилган. Гўшт ва гўшт маҳсулотлари эса аксинча февраль ой давомида 0,1 фоизга арзонлашди. Нархларнинг пасайиши ёғ-мой маҳсулотларида ҳам қайд этилди — 0,2 фоизга. Сут маҳсулотлари ва тухумнинг нархи ҳам 0,1 фоизга тушди.
Ўтган йилнинг февралига нисбатан нархларнинг ўсиш суръати қуйидагича бўлди:
- гўшт маҳсулотлари — 9,6 фоиз;
- донли экинлар ва ёрма маҳсулотлари — 7,5 фоиз;
- балиқ ва бошқа денгиз маҳсулотлари — 11,8 фоиз;
- сут маҳсулоталри ва тухум — 9,6 фоиз;
- ёғлар ва мойлар — 23 фоиз;
- мевалар ва ёнғоқлар — 14,7 фоиз.
Изоҳ (0)