Россия томони Украинанинг 2,2 мингта ҳарбий объекти йўқ қилингани ҳақида хабар берди. Украина маълумотларида 11 минг россиялик аскар ҳалок бўлгани айтилмоқда

Россия Мудофаа вазирлиги «махсус операция» давомида Россия қўшинлари «Украина ҳарбий инфратузилмасининг 2203 та объектини ишдан чиқаргани» ҳақида хабар берди. Вазирлик маълумотларига кўра, ҳаводаги 24 та ва ердаги 69 та самолёт, 778 та танк ва бошқа зирҳли жанговар техникалар йўқ қилинган.

Ўз навбатида, Украина Бош штаби уруш бошидан буён 11 мингдан ортиқ россиялик аскар ҳалок бўлганини маълум қилди. Украина томонининг маълумотларига кўра, Россия армиясининг йўқотишлари 285 та танк, 985 та зирҳли техника, 44 та самолёт ва 48 та вертолётни ҳам ташкил этган.

Россия Мудофаа вазирлиги Россия армиясининг йўқотишлари ҳақида оператив режимда хабар бермаяпти. Вазирлик қурбонлар сони ҳақидаги маълумотни фақатгина 2 мартга келиб эълон қилган. Унда айтилишича, 498 нафар россиялик ҳарбий ҳалок бўлган, 1597 нафари яраланган.

Уруш шароитида низонинг у ёки бу томонидан расмий вакиллар тарқатган маълумотларни тезда текширишнинг имкони йўқ.

5 март куни  БМТ Инсон ҳуқуқлари бўйича Олий комиссари бошқармаси Украинадаги уруш вақтида камида 351 нафар тинч аҳоли вакили ҳалок бўлгани, 707 нафар одам яралангани ҳақида ҳисобот берганди.

Украина шаҳарларида ўн кундан буён ўт очишлар давом этмоқда. 27 февраль куни Украина Россия устидан Халқаро судга расман даъво аризасини берганди. Унда ўз тажовузини оқлаш мақсадида геноцид тушунчасини бузиб кўрсатгани учун Россияни жавобгарликка тортиш талаб қилинган. 3 март куни Халқаро жиноий суд Украинадаги вазият юзасидан терговни бошлади.