Россияда бугун, 6 март куни бутун мамлакат бўйлаб Украинадаги урушга қарши акциялар бўлиб ўтмоқда. «ОВД-Инфо» хабарига кўра, Россиянинг 44 та шаҳрида полиция 2000 дан ортиқ одамни ҳибсга олган.
Хусусан, Москва марказидаги Манежная майдони ва Моховая кўчасида намойишга чиққанлар полиция томонидан оммавий ҳибсга олинаётгани акс этган видеолар тарқалди.
Журналистлар Манежная майдонидан мажбуран чиқариб юборилмоқда. Афтидан, ҳудуд ўраб олинмоқда.
Аввалроқ Владивосток ва Хабаровскдаги намойишлар орасидан камида 15 киши, Иркутскда яна бир киши қўлга олингани ҳақида хабар берилган.
Санкт-Петербургда Гостиний двор яқинида ўтказилаётган митинг иштирокчилари ҳам ҳибсга олинган. «Бумага» нашрининг хабар беришича, қўлга олинганлар орасида журналистлар ҳам бор. Бундан ташқари, гувоҳлар томонидан олинган видеода ёш болали эркак қўлга олинганини кўриш мумкин. Қайд этилишича, ота-бола Гостиний двор яқинида бирга сайр қилаётган бўлган.
Украинадаги урушга қарши акциялар Нижний Новгородда ҳам бўлиб ўтмоқда.
Бир вақтнинг ўзида Москва кўчаларида Россиянинг Украинадаги «ҳарбий операцияси» тарафдорлари ҳам митинг ўтказмоқда.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)