«Олий таълим соҳасидаги хизматлари учун» ҳамда «Ўрта махсус ва профессионал таълим соҳасидаги хизматлари учун» кўкрак нишонларини таъсис этиш бўйича Вазирлар Маҳкамаси қарори жамоатчилик муҳокамасига қўйилди.
Қайд этилишича, кўкрак нишони билан олий таълим соҳасида ёшларни вояга етказишда фидокорона меҳнат қилаётган, ёрқин истеъдоди ва ижоди, ватанпарварлик фазилатлари билан эл-юрт ўртасида ҳурмат қозонган фаол, ташаббускор, соғлом ва баркамол авлодни вояга етказиш, ёш авлодни ватанпарварлик ғояларига садоқат руҳида тарбиялаш борасида соҳа ривожига муносиб ҳисса қўшган фуқаролар тақдирланади.
Бунинг учун таълим муассасалари номзодларни кўкрак нишони билан тақдирлаш бўйича ҳар йили 20 июлга қадар Олий ва ўрта махсус таълим вазирлигига таклиф киритади. Таклифда номзод ҳақида маълумотнома, сўнгги 3 йил давомида самарали фаолияти акс эттирилган тавсифнома бўлиши керак.
Кўкрак нишонлари 1 октябрь — Ўқитувчи ва мураббийлар куни байрами арафасида топширилади. Мукофотлаш олий ва ўрта махсус таълим вазири буйруғи асосида амалга оширилади. Вазир томонидан ҳар йили 1 августга қадар кўкрак нишони билан тақдирлашга оид таклифларни кўриб чиқиш бўйича комиссия ташкил этилади.
Кўкрак нишони билан чет эл фуқаролари ва фуқаролиги бўлмаган шахслар ҳам низом талаблари асосида тақдирланиши мумкин. Чет эл фуқароларини тақдирлашга доир тақдимнома комиссияга киритилади.
Комиссия томонидан номзодларни кўкрак нишони билан тақдирлашда қуйидагилар инобатга олинади:
- олий таълим муассасаларининг педагог ходимлари фаолиятини ўрганиш мезонларида қайд этилган кўрсаткичлар бўйича олинган юқори баҳолар;
- талабалар орасида илм-фанга бўлган қизиқишни ошириш, устоз-шогирд анъаналарини тарғиб қилишдаги фаол иштироки;
- олиб бораётган илмий тадқиқотлари, ижодий фаолиятлари ва яратаётган ўқув-услубий қўлланмаларида янгиликларнинг кўплиги тан олинганлиги;
- ўз педагогик фаолиятида турли инновацион самарали усулларни ишлаб чиққанлиги.
- ўзи фаолият олиб бораётган олий таълим муассасасида амалга оширган ишлари туфайли ҳамкасблари томонидан чуқур ҳурматга сазоворлиги.
«Ўрта махсус ва профессионал таълим соҳасидаги хизматлари учун» ҳамда «Олий таълим соҳасидаги хизматлари учун» кўкрак нишонининг диаметри 34 миллиметрли доира шаклида бўлиб, мис қотишмасидан тайёрланади.
Аввалроқ Ўзбекистонда халқ таълими тизимини ислоҳ қилиш бўйича миллий кенгаш ташкил этилиши хабар қилинганди. Кенгаш ўқитувчи касбининг мақоми ва обрўсини кўтариш, уларнинг моддий ва ижтимоий қўллаб-қувватланишини таъминлаш, самарали меҳнат фаолияти учун муносиб шароитлар яратишга кўмаклашади.
Изоҳ (0)