2002 йилда илк маротаба 120 нафар талаба билан фаолият бошлаган Тошкентдаги халқаро Вестминстер университети 4 март куни Алишер Навоий номидаги давлат академик катта театрида ўзининг 20 йиллигини нишонлади, деб хабар бермоқда «Дарё» мухбири.
Маълум бўлишича, 2021/2022-ўқув йилида Тошкентдаги халқаро Вестминстер университетига 5 мингдан ортиқ талаба ўқишга қабул қилинган.
«2002 йилда университет кичкина бўлган. Биз катта ютуқларга эриша оламизми, деб ўйлаганмиз. Лекин мана 20 йил ичида 5 000 нафар битирувчини чиқардик. Бизда ижтимоий муҳит ривожланган. Талабалар нафақат дарслар, балки турли тўгаракларда ҳам фаол. Талабалар ташаббуси билан кўплаб тўгараклар йўлга қўйилган. Биз талабаларнинг фикрини эшитамиз ва ҳамиша қўллаб-қувватлаймиз. Келгусида янада кенгайишни, янги фанлар киритишни режалаштиряпмиз», — дейди университетнинг ёшлар масалалари бўйича проректори Низомжон Қодиров.
Таъкидланишича, ҳозирги кунда университетда 5 та бакалавриат ҳамда 8 та аспирантура курслари ташкил этилган.
Қайд этилишича, ҳозирда университет Корея, Германия, Англия ва Америкадаги турли нуфузли университетлар билан меморандум тузган. Кейинчалик ушбу университетлар билан қўшма дастурлар ҳам очилиши кўзда тутилган.
Изоҳ (0)