Арманистон парламенти 3 март куни бўлиб ўтган яширин овоз бериш жараёнларининг иккинчи турида юқори технологиялар саноати вазири Ваагн Хачатрянни республика президенти этиб сайлади, деб хабар беради «ТАСС».
«Ваагн Хачатурян номзодига 71 нафар депутат овоз берган, у Арманистон президенти этиб сайланди», — дейди парламент спикери вазифасини бажарувчи Акоп Аршакян.
Арманистон конституциясига кўра, иккинчи турда президент этиб сайланиш учун жами 107 нафар депутатнинг камида бешдан уч қисми овоз бериши керак.
Ваагн Хачатурян Арманистонни 1991—1998 йилларда бошқарган Левон Тер-Петросян сиёсий иттифоқчиси ҳисобланади.
Хачатурян 1992—1992 йилларда Ереван мери, 1996—1998 йилларда президент маслаҳатчиси бўлган. 2019 йилдан 2021 йилга қадар арманистонлик йирик тадбиркор, ҳукмрон партиядан парламентга депутат сифатида сайланган Хачатур Сукиасяннинг оиласига тегишли «Армеконбанк» бошқарув аъзоси бўлган. 2021 йилнинг августида Хачатурян юқори технологиялар саноати вазири этиб тайинланганди.
Маҳаллий экспертларнинг тахминича, Пашинян унинг номзодини фақатгина содиқлиги учун танлаган. Таҳлилий доиралар таъкидлашича, ҳукумат раҳбарига бу лавозимда «ўз одами» керак, чунки у яқин орада Анқара ва Боку билан келишиши мумкин.
Армен Саркисян истеъфога чиқишини 23 январь куни эълон қилганди, парламент 1 февраль куни унинг қарорини тасдиқлаган. У давлат раҳбарлигидан кетаётганини мамлакат сиёсати, уруш ва тинчлик масалаларига таъсир ўтказа олмаётгани билан изоҳлаган эди.