Аббосбек Файзуллаев ҳам Осиё кубоги финалида ўйнамайди

Ўзбекистон Олимпия терма жамоаси ҳамда Россиянинг “ЦСКА” клуби ярим ҳимоячиси Осиё кубоги финал учрашувини ўтказиб юборади.

Бу ҳақда ЎФА матбуот хизмати хабар бермоқда. Таъкидланишича, футболчи Москвага йўл олган.

“U-23 Осиё кубогида терма жамоамизнинг тарихий натижасига муносиб ҳисса қўшган футболчимиз Аббосбек Файзуллаев келишувга мувофиқ, навбатдаги муҳим ўйинларга тайёргарлик кўриш учун Москвага йўл олмоқда.   

ЎФА Олимпиада йўлланмасини қўлга киритишда легионеримизнинг терма жамоамиз ихтиёрига етиб келишига кўмаклашгани учун “ЦСКА” клубига миннатдорчилик билдиради”, — дейилади ЎФА матбуот хизмати берган хабарида.

Эслатиб ўтамиз, Аббосбек Файзуллаев терма жамоа сафига турнир ярмида келиб қўшилган ва Ўзбекистон Олимпия терма жамоасининг чорак ва ярим финал баҳсларида асосий таркибда майдонга тушган эди. Футболчи Саудия билан бўлган учрашувда Норчаевнинг голига ҳаммуаллифлик қилган эди. 
Бундан ташқари, Аббосбек Файзуллаевнинг майдон марказидаги фаоллиги ғалабаларда асосий роль ўйнади. 

Ўзбекистон Олимпия терма жамоаси финал баҳсида Японияга қарши ўйнайди. Учрашув 3 май куни 20:30 да бошланади.