Олмалиқ кон-металлургия комбинати таркибидаги 3-мис бойитиш фабрикаси ишга тушса, йилига 1 миллион тонна мис концентрати ишлаб чиқилади. Амалга оширилаётган лойиҳа дунёдаги энг йирик лойиҳалардан бири ҳисобланади. Бу ҳақда комбинат масъуллари ОАВ вакиллари ва блогерлар учун ташкил этилган пресс-турда маълум қилди, дея хабар берди “Дарё” мухбири.
Билдирилишича, ушбу концентратдан мис ва бошқа қимматбаҳо металларни ажратиб олиш, улардан турли хил қотишма ҳамда соф металлар ишлаб чиқариш учун янги металлургия объектларини барпо этиш лозим бўлади.
“Янги металлургия мажмуасини қуриш учун мисни эритиш ва конвертерлаш бўйича энг илғор ва етакчи технологиялар ўрганиб чиқилди. Комбинат томонидан танлаб олинган технология бу мис концентратидан мисни ажратиб олиш даражаси 98,4 фоизни ташкил этиши билан аҳамиятли ҳисобланади. Энг муҳими, янги қуриладиган металлургия мажмуаси атроф-муҳитга мутлақо зарарсиз ҳисобланиб, барча технологик жараёнлар тўлиқ ёпиқ бўлади. Ҳосил бўлиши мумкин бўлган зарарли шароитлар минимал даражада бўлиб, зарарли газларни ушлаб қолиш 99,2-99,7 фоиз бўлиши белгиланган”, — дейди ОКМК бошқарув раиси А.Хурсанов
Лойиҳани амалга ошириш учун Канадаги дунёнинг етакчи “ҲАTCH” мустақил консалтинг компанияси жалб қилинган.
Шунингдек, Олмалиқ кон-металлургия комбинати АЖ металлургия мажмуаси объектларини қуриш дирексияси директори Алишер Шоносировнинг маълумот беришича, янги металлургия мажмуасида йилига 300 минг тонна мис ва 1,8 миллион тонна сулфат кислотаси ишлаб чиқарилади.
Сулфат кислотаси кимё, уран саноати, янги саноат корхоналари ишлаб чиқариш қувватларини янада оширишга замин яратади.
“Мис ишлаб чиқариш қувватларининг оширилиши ўз навбатида, мис хом ашёсини республиканинг ўзида қайта ишлаб, юқори қўшимча қийматга эга янги турдаги мис маҳсулотлар ишлаб чиқарилишига замин яратади. Бундан ташқари, мис концентратлари таркибидан олинган олтин ва кумуш республика олтин-валюта захиралари кўпайишига, заргарлик саноати корхоналарининг ривожланишига хизмат қилади”, — дейди у.
Масъулларнинг қўшимча қилишича, бунинг яна бир муҳим жиҳати ушбу лойиҳанинг амалга оширилиши натижасида минглаб янги иш ўринлари яратилади.
Бу лойиҳа шубҳасиз Олмалиқ кон-металлургия комбинатини жаҳондаги энг йирик мис эритиш корхоналаридан бирига айлантиради.
Олмалиқ кон-металлургия комбинати ахборот хизматининг қайд этишича, ҳозирда “Ёшлик-1” конини ўзлаштириш ва 3-мис бойитиш фабрикасини қуриш доирасида йилига 60 миллион тонна маъданни қазиб олишга кон тўлиқ тайёрланган. Бунинг учун 183 миллион куб метр бўш тоғ жинслари қазиб олинган. Натижада, ҳозирда кон узунлиги 4,0 км, эни 3,5 км ва чуқурлиги 90 метрга етган. Бошқа фабрикалардан фарқли ўлароқ, коннинг ўзида маъданларни биринчи майдалаш-юклаш қурилмаси барпо этилган.
Айни пайтда 3-мис бойитиш фабрикасининг ишлаб чиқариш бўлинмалари учун зарур бўлган барча технологик ускуналар қурилиш майдонига олиб келиниб, монтаж ишлари олиб борилмоқда. Ёшлик-1 кони ва 3-мис бойитиш фабрикаси ишга тушса, яна олти мингта иш ўрни яратилади, бюджетга йилига қўшимча 300 миллион доллардан ортиқ солиқ тушади. Экспорт 300 миллион долларга ортади.
Пресс тур иштирокчилари 3 мис бойитиш фабрикаси қурилиш жараёни янги рақамли нимстанция билан таништирилди.
Реклама ҳуқуқи асосида.
Изоҳ (0)