Ижтимоий тармоқларда мактаб ўқувчилари учун мўлжалланган ягона электрон таълим платформаси «Kundalik.com» тизимида аёллар гигиеник воситаси реклама қилинаётгани тўғрисида хабар берилганди. Истеъмолчилар ҳуқуқларини ҳимоя қилиш агентлиги «Кундалик» МЧЖга вояга етмаган шахсларга мўлжалланмаган маҳсулотларнинг реклама ва маркетингига йўл қўймаслик бўйича сўров хати ҳам юборган. «Кундалик» электрон таълим платформаси ҳолат юзасидан изоҳ берди.
Маълум қилинишича, сайт саҳифаларида «Реклама тўғрисида»ги 1998 йил 25 декабрдаги Н 723-I қонунига зид бўлмаган мазмундаги реклама мавжуд. «Kundalik.com» фақат тасдиқланган реклама берувчиларнинг рекламаларини 6+ тоифасига мувофиқ жойлаштиради.
Таъкидланишича, аёллар гигиенаси мавзусидаги рекламалар фақат аудиториянинг аёллар қисмигагина кўрсатилади. Шу билан бирга, бундай мазмундаги реклама таълимий хусусиятга эга бўлиб, қизлар ва оналарнинг ўз саломатлигидан хабардорлик даражасини оширади. Хизматлардан фойдаланишдан аввал қабул қилинган фойдаланувчи шартномасида реклама мазмуни мавжудлиги тўғрисидаги маълумотлар мавжуд (1.12-банд).
«Қайд этамиз, реклама электрон кундаликка кириш ва рўйхатдан ўтказиш учун тўловдан қатъи назар жойлаштирилади, бунда қонун бузилиши йўқ. Ҳозирда ушбу бренд билан ҳамкорлик аудитория аёллар саломатлиги мавзусининг аҳамиятини нотўғри тушунгани ва ахборот хабарини нотўғри талқин қилишига йўл қўймаслик мақсадида тўхтатиб қўйилган», — дейилади изоҳда.
Эслатиб ўтамиз, Ўзбекистон мактабларида «Кундалик» электрон тизимини татбиқ этиш 2019 йилдан бошланган эди. Бошланғич даврда тизимдан фойдаланиш бепул бўлган, 2020 йил ноябридан пуллик тартибга ўтган. Ўшанда тизимдан бир йиллик фойдаланиш баҳоси бир ўқувчи учун 9200 сўм эди (ҳозирда 10 минг сўмни ташкил этади)
Ушбу тизимнинг татбиқ этилиши ўқитувчи ва ота-оналарнинг барчаси томонидан ҳам бирдек илиқ кутиб олинмаган. Хусусан, Халқ таълими вазирлиги томонидан таклиф этилаётган пуллик кундалик тизими болаларнинг бепул таълим олиш ҳуқуқига дахл қилмайдими, деган масала мунтазам кун тартибига чиқиб туради.
Изоҳ (0)