Шавкат Мирзиёев Вазирлар Маҳкамасига Ўзбекистоннинг асосий савдо ҳамкорлари бўлган айрим мамлакатларда юзага келаётган вазиятни ҳисобга олган ҳолда, вужудга келиши мумкин бўлган барча салбий ижтимоий-иқтисодий оқибатларни юмшатиш бўйича республиканинг ҳар бир тармоғи ва ҳудуди кесимида аниқ чора-тадбирларнинг батафсил режасини ишлаб чиқишга топшириқ берди.
Президент матбуот котиби Шерзод Асадовнинг маълум қилишича, молия тизимининг барқарорлиги, корхоналарнинг узлуксиз ишлаши ва режалаштирилган инвестиция лойиҳалари ўз вақтида амалга оширилишини таъминлаш вазифаларига алоҳида эътибор қаратилди.
Тармоқ ва ҳудудлар раҳбарлари олдига транспорт-логистика тармоғининг ишончли фаолиятини таъминлаш бўйича қўшимча чора-тадбирлар кўриш, бунда экспорт географияси янада диверсификация қилинишини ҳам ҳисобга олиш вазифаси қўйилди.
Вилоятлар ҳокимларига аҳолини ижтимоий ҳимоя қилиш ишларини кучайтириш, янги иш ўринлари яратиш ва ишсиз аҳоли бандлигини таъминлашни жадаллаштириш, шунингдек, инфляция даражасини доимий мониторинг қилиш ва истеъмол бозорида нархларнинг кескин тебранишларига йўл қўймаслик бўйича аввалдан чора кўриш зарурлиги алоҳида кўрсатиб ўтилди.
Давлат статистика қўмитаси маълумотларига кўра, Россия ва Украина Ўзбекистоннинг ташқи савдодаги юқори улушга эга бўлган ҳамкор давлатлардан ҳисобланади. Айни пайтда бу икки давлат ўртасидаги вазият тобора таранглашиб бормоқда.Давом этаётган ҳарбий вазият туфайли Украинадаги барча Ўзбекистон корхоналари фаолиятини тўхтатди. ТИВ ахборот хизмати ахборотига кўра, 2022 йил учун тасдиқланган мақсадли инвестиция дастури доирасида Украина компаниялари иштирокида умумий қиймати 16,5 миллион АҚШ долларидан иборат 4 та инвестиция лойиҳасини амалга ошириш кўзда тутилган. Мавжуд вазият туфайли юқоридаги ва бошқа ишлаб чиқилаётган инвестиция лойиҳаларини амалга ошириш қийинлашади.
Россия эса Украина можаролари билан боғлиқ санкцияларга дуч келди. Иқтисодий тадқиқотлар ва ислоҳотлар маркази мутахассисларининг айтишича, ушбу санкциялар анчайин жиддий бўлиб, унинг салбий оқибатлари нафақат Россияга, балки бошқа мамлакатлар иқтисодиётига ҳам таъсир ўтказиши мумкин.
Изоҳ (0)