Ўзбекистондаги ҳар бир олий таълим муассасасида кузатув кенгаши ташкил этилиши мумкин

Олий ва ўрта махсус таълим вазирлиги Норматив-ҳуқуқий ҳужжатлар лойиҳалари муҳокамаси порталига «Олий таълим муассасасининг кузатув (васийлик) кенгаши тўғрисидаги намунавий низомни тасдиқлаш тўғрисида»ги Вазирлар Маҳкамаси қарори лойиҳаси муҳокамага қўйди.

Қарор лойиҳасига кўра:

• Кенгаш олий таълим муассасасини самарали бошқаришда стратегик орган ҳисобланади;
• Кенгаш таълим йўналишлари, мутахассисликлар ҳамда ихтисосликлар бўйича тўлов-контракт асосида ўқишга қабул параметрларини ҳам белгилайди;
• Кенгаш таркибига Олий Мажлис палаталари аъзолари, халқ, маҳаллий кенгаш депутатлари, вазирлик, идоралар, ННТ, ОАВ ва жамоатчилик вакиллари, ҳомийлар, шунингдек, ОТМ фаолиятини ривожлантиришдан манфаатдор бўлган юридик ва жисмоний шахслар кириши мумкин.

Кенгаш таркибига ҳуқуқни муҳофаза қилиш ва суд органларининг, ҳарбийлаштирилган тузилмаларнинг, шунингдек, Ўзбекистон президентига ҳисобот берадиган давлат бошқаруви органларининг раҳбарлари киритиладиган ҳолатларда тасарруфида тегишли олий таълим муассасаси бўлган вазирлик ва идоранинг тақдимномасига биноан Вазирлар Маҳкамаси томонидан Ўзбекистон президентига кўриб чиқиш учун киритилади.