Британия Беларуснинг тўрт нафар генералини санкциялар рўйхатига киритди

Буюк Британия Беларусь мудофаа вазирининг тўрт ўринбосари ҳамда мамлакатнинг икки мудофаа муассасасини санкциялар рўйхатига қўшиб қўйди. Бу ҳақда Буюк Британия ҳукумати эълон қилган ҳужжатда маълум қилинган.

Беларусь генерал майорлари Андрей Будико, Сергей Симоненко, Андрей Жук ва Бош штаб бошлиғи Виктор Гулевичга нисбатан санкциялар қўлланилди. Уларнинг мамлакатда топилган мол-мулки музлатилади ва ушбу рўйхатдаги ҳарбийларнинг Буюк Британия ҳудудига кириши тақиқланади. Рўйхатга киритилган мудофаа вазири ўринбосарлари Бирлашган Қироллик томонидан Беларуснинг фаол, жамоатчилик яхши танийдиган ва юқори лавозимда фаолият олиб борувчи амалдорлар деб тан олинган. Улар юқори даражадаги қўмондонликнинг бир қисми сифатида Россиянинг Украинага қилган ҳужумини қўллаб-қувватлаган ва бунга йўл қўйган Беларусь қуролли кучларининг ҳарбий ҳаракатларига жавоб беради, дейилади ҳужжатда.

Шунингдек, Буюк Британияда Беларусь мудофаа муассасалари «558 авиация таъмирлаш заводи» ҳамда «Интеграл»нинг активлари музлатиб қўйилди.

Лондон ҳужум вақтида Россия самолётларининг Барановичи авиабазасидан ҳаракатга келтирилгани, «558 авиация таъмирлаш заводи» эса авиацияга техник хизмат кўрсатилиши амалга оширмоқда. Ҳужжатда заводнинг Украинадаги махсус операцияларда иштирок этаётган самолётларга хизмат кўрсатаётгани юзасидан гумонлар мавжудлиги қайд этилган.

«Интеграл» суюқ кристалл индикаторлари ва интеграл схемалар ишлаб чиқарувчисининг маблағлари ҳам музлатиб қўйилади, сабаби ушбу корхона Беларусь ва Россия ҳарбий кучлари учун комплектлар етказиб беради, дейилади Буюк Британия ҳукуматининг тақиқлар ҳақидаги ҳужжатида.

Россияга қарши бир қатор давлатлар, хусусан ЙИ, АҚШ, Канада, Япония, Австралия ва бошқа мамлакатлар санкциялар жорий этган. Чекловлар Россия банклари («ВТБ» ва «Сбербанк» ҳам бор), Россиядан юқори технология маҳсулотларини экспорт қилиш, Марказий банк, Молия вазирлиги, Россия тараққиёт жамғармаси ва катта давлат корпорациялари, Россия Хавфсизлик кенгаши аъзолари, Давлат думаси депутатларига нисбатан ҳам татбиқ қилинган.

28 февралда Владимир Путин АҚШ ҳамда бошқа ғарб давлатларининг дўстона бўлмаган ҳаракатлари ва хориж давлатлари, халқаро ташкилотларнинг чекловларига қарши иқтисодий чора-тадбирлар тўғрисида фармонни имзолаган.