Prezident Vladimir Putin Rossiya hududidan 10 ming dollardan ortiq valyuta olib chiqib ketishni taqiqladi. Bu haqda Kreml saytida e’lon qilingan prezident farmonida so‘z boradi.
“2022-yil 2-martdan boshlab Rossiya Markaziy bankining rasmiy kursi bo‘yicha hisoblangan 10 ming dollardan ortiq naqd xorijiy valyutani va (yoki) xorijiy valyutadagi pul vositalarini olib chiqib ketish taqiqlanadi”, — deyiladi farmonda.
Bundan tashqari, farmon bilan Rossiyaning “do‘st bo‘lmagan mamlakatlar” norezidentlariga va ular tomonidan nazorat qilinadigan tuzilmalarga xorijiy investitsiyalarni nazorat qilish bo‘yicha hukumat komissiyasining ruxsatisiz qimmatli qog‘ozlar va ko‘chmas mulk bilan operatsiyalarni amalga oshirish, rubl kreditlarini olish taqiqlangan.
Hujjat matnida ta’kidlanishicha, farmon “AQSh hamda unga qo‘shilgan xorijiy davlatlar hamda xalqaro tashkilotlarning Rossiyaga qarshi sanksiyalar qo‘llash bilan bog‘liq do‘stona bo‘lmagan va xalqaro huquqqa zid harakatlari munosabati bilan” imzolangan.
Nashrning yozishicha, oldinlari Rossiyadan 10 ming dollardan ortiq naqd ko‘rinishdagi valyutani olib chiqib ketish uchun u deklaratsiya qilinishi kerak bo‘lgan. 2021-yilning oktabrida “Praym” agentligi Rossiya iqtisodiyotidagi naqd xorijiy valyuta hajmi 100 milliard dollar ekvivalentga yetgani va bu tarixiy maksimum ekani haqida yozgandi.
Avvalroq Putin g‘arb davlatlarining sanksiyalariga qarshi javob choralarini ko‘rish bo‘yicha farmon imzolagan edi. Hujjat bilan xorijiy valyutani o‘z xorijiy hisob raqamlariga kiritish, xorijiy to‘lov xizmatlarini ko‘rsatuvchi provayderlarga “elektron to‘lov vositalaridan foydalangan holda” pul o‘tkazish va kredit shartnomalari bo‘yicha norezidentlarga chet el valyutasini o‘tkazish taqiqlandi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)