Ижтимоий тармоқларда Ўзбекистон фуқаролари Украинадаги жанговар ҳаракатларда иштирок этишга жалб қилинаётгани ҳақида хабарлар тарқалди. Мудофаа вазирлиги ҳарбий хизматчиларни ёллаш бўйича тарқалган хабарларга муносабат билдирди.
Қайд этилишича, Ўзбекистон Конституциясининг 125-моддасига мувофиқ, Қуролли Кучлар давлат суверенитетини ва ҳудудий яхлитлигини, аҳолининг тинч ҳаёти ва хавфсизлигини ҳимоя қилиш учун тузилади. Мудофаа доктринасига кўра, Ўзбекистоннинг мудофаа соҳасидаги сиёсати бошқа давлатларнинг ички ишларига аралашмаслик, эҳтимол тутилган низоларни тинч йўл билан ҳал этиш тамойилларига асосланади.
Жиноят кодексида чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш бўйича жиноий жавобгарлик (154-модда — ёлланиш) моддаси мавжуд.
«Ўзбекистон ҳарбий хизматчилари мамлакатдан ташқаридаги ҳарбий ҳаракатларда иштирок этмайди. Ўзбекистонда хорижий давлатлар томонидан ҳарбий хизматга ёллаш бошлангани ҳақида тарқалган маълумотлар ҳеч қандай асосга эга эмас», — дейилади хабарда.
Изоҳ (0)