Қашқадарё вилоятининг Қарши туманидаги «Керайт» ма ҳалласида яшовчи фуқаролар туманнинг собиқ ҳокими Мақсуда Мустафоева уларга ер берганини, ер обод қилингач эса тортиб олиниб, тадбиркорга ҳужжатлаштириб берилганини айтмоқда. Бу ҳақда «Дарё»га мурожаат қилган аҳоли вакиллари ерни ободонлаштириш учун катта маблағ сарфлаганини, умидлари пучга чиқаётганини айтмоқда.
«Намунали уйларда яшаймиз. Коттежимиз олдида қаровсиз ер бор эди. Вилоятнинг собиқ ҳокими Зоир Мирзаев маҳалламизга келганида қаровсиз ерни кўриб, ердан унумли фойдаланиш кераклигини, обод қилиш лозимлигини айтганди. Шундан сўнг туманнинг ўша пайтдаги ҳокими Мақсуда Мустафоева биз билан учрашиб, ҳамма уйининг орқа томонидаги ерни обод қилса, ер уларга қонуний тартибда берилишини айтди. Биз эса бундан хурсанд бўлиб, қаровсиз ерни экин экишга тайёрладик. Ерни ағдариб, фойдаланиш учун тайёр ҳолатга келтирдик. Аммо ер тайёр бўлганда эса, ҳоким боғдорчилик учун фермерга бериб юбораётганини билиб қолдик. Маҳалладошлар йиғилиб, ҳокимнинг олдига бордик. Аммо ҳоким биз билан кўришмасликка ҳаракат қилди», — дейди Султон Тошев.
Султон Тошевнинг айтишича, у қаровсиз ётган ердан 1 гектар олиб, боғ яратган.
«Оиламиз жуда катта. 20 киши яшаймиз. Меҳнат қилувчилар кўп дея бир гектар ер олиб, боғ яратгандик. Бугунги кунга келиб эса, ер бошқа фермерга бериб юборилаётганини айтишди. Бизнинг меҳнатимиз ва харажатларимиз нима бўлади? Нега ҳоким опа айтиб, айтган гапидан қайтди? Буни тартибга олиб, адолатли қарор чиқарадиган киши йўқми», — дейди Султон ака.
Шу маҳаллада яшовчи Ирода Санаеванинг айтишича, собиқ ҳоким Мақсуда Мустафоева 2021 йилнинг 2 февраль куни шу маҳаллага келиб, одамлар билан кўришган.
«Туман ҳокими вилоят раҳбари танбеҳ бериб кетгач, келиб биз билан кўришди. Шу қаровсиз ерларни обод қилайлик, дарахтлар экиб, чиройли жойга айлантирайлик, ерни Сизга берамиз, деди. Биз ҳоким опа айтган ишни қилдик. Аммо охирида алданиб қолдик», — дейди Ирода Санаева.
«Дарё» мухбири билан суҳбатлашган маҳалла аҳли ҳокимга айтган ваъдасини эслатиш ва ерни қонунийлаштириб олиш мақсадида ҳоким қабулига 33 маротаба борганини, аммо иши битмаганини айтмоқда.
«2021 йил ноябрда туман ҳокимлиги бизни судга берди ва ердан мажбурий тартибда чиқариб юборишларини айтди. Биз эса ҳокимнинг оғзаки гапига ишониб, чув тушдик», — дейди маҳалла аҳли.
Маҳаллада яшовчи яна бир фуқаро Ражаббой Саидовнинг айтишича, улар обод қилиб, боғ яратган ер аслида чиқиндихона бўлган.
«Шахсан ўзим 1001 та кўчат экдим. Боғ қилдим. Болаларим ва ўзим шу боғ учун қанча меҳнат қилдик. Энди ерни экинга тайёрлаб, фойдалана бошлаганимизда бошқа биров эга чиқмоқда», — дейди Ражаббой ака.
Шу маҳаллада яшовчи Карим Раҳматуллаев ҳам ҳоким опанинг гапига ишониб, уларга берилган ерда оилавий меҳнат қилганини, аммо энди алданиб қолганини айтмоқда.
«Бизга берилган ерда 330 туп бодом эккандик. Энди айнан шу еримизни бошқа бировга бериб юборишибди. Тайёрига айёр бўлганлар эса, экилган кўчатларимизга эга чиқишмоқда. Биз бу ер учун қанча харажат қилгандик. Ҳоким опа билан кўришишга ҳаракат қилдик, аммо натижа бўлмади. Мана энди у ҳоким бўшаб ҳам кетди. Билмадим, энди муаммомиз қандай ечим топади?», — дейди Карим Раҳматуллаев.
Қарши тумани ҳокимлиги масъуллари вазиятга изоҳ берар экан, аҳоли ер беришни ваъда қилди дейилган ҳоким Мақсуда Мустафоева айни пайтда ишдан кетганини, туман ҳокимининг ўша пайтда фаолият юритган қишлоқ хўжалиги масалалари бўйича ўринбосари Акром Арипов ҳам айни кунда Муборак туманида фаолият юритаётганини билдириб, амалда бўлиб турган масъуллар вазиятдан бехабарлигини маълум қилди.
Ҳокимлик масъулларининг қўшимча қилишича, аҳоли мевали дарахтлар экиб, обод қилганмиз дейилаётган 5 гектар ер 2021 йил 9 февраль куни туман ҳокими қарори билан А.Сафаровга боғдорчилик қилиш учун берилган.
Аҳоли айни кунда мазкур масала юзасидан суд иши ҳам бошланганини, ачинарлиси уларга ер берилиши лозимлигини айтиб, ҳудудни ободонлаштириш лозимлиги ҳақида топшириқ берган вилоятнинг собиқ ҳокими Зоир Мирзаев ҳам, уларга ер берилишини ваъда қилган ҳоким Мақсуда Мустафоева ҳам, мазкур ишга масъуллик зиммасига юклатилган Акром Арипов ҳам айни кунда бу туманда йўқ. Ишдан кетган. Аҳоли эса уларнинг оғзаки ваъдасига ишониб, бугун афсусда қолган.
Изоҳ (0)