2 март куни Ўзбекистонга COVAX дастури доирасида шприц ва уларни хавфсиз утилизация қилиш учун қутилардан иборат умумий қиймати 669 минг долларга тенг бўлган юк етиб келди. Бу ҳақда UNICEF’нинг Ўзбекистондаги ваколатхонаси матбуот хизмати хабар берди.
Маълум қилинишича, шприцлар 2022 йилнинг март ойи ўрталарида етказиб бериш режалаштирилган Pfizer-BionNTech вакцинаси билан эмлаш учун ишлатилади.
Аввалроқ COVAX дастури доирасида Ўзбекистонга яна 2 822 400 доза Moderna вакцинасини етказиб берилгани, UNICEF орқали Ўзбекистонга ушбу механизм доирасида ҳамда хайрия қилинган COVID-19 га қарши вакциналарининг умумий сони 12,67 миллион дозага етгани тўғрисида хабар берилганди. Уларнинг умумий қиймати 97,4 миллион АҚШ долларини ташкил этмоқда.
25 февраль куни Санитария-эпидемиологик осойишталик хизмати раҳбари Баҳодир Юсупалиев март, июнь ва июль ойларида яна 4 миллион доза Pfizer вакцинаси олиб келинишини маълум қилганди.
Изоҳ (0)