Шавкат Мирзиёев 1 март куни бўлиб ўтган видеоселектор йиғилишида алимент тўлаш масалаларига эътибор қаратди. Бу ҳақда президент матбуот котиби хабар қилди.
Қайд этилишича, бугунги кунда 290 мингдан зиёд оталарга фарзандлари учун алимент тўлаш юкланган. Лекин уларнинг 172 минг нафари ўз фарзанди олдидаги мажбуриятини бажаришдан бош тортиб келмоқда.
«Оқибатда алимент бўйича қарздорлик 115 миллиард сўмдан ошиб кетган. Ҳар бир вилоят ҳокими ўз рақамларини билади. Шу боис 2021 йили Халқ қабулхоналарига алимент билан боғлиқ 70 мингга яқин мурожаат келиб тушган. Бу борада Мажбурий ижро бюросининг фаолияти қониқарсиз. Энди алимент тўловларини кафолатли таъминлаш бўйича янги тизим жорий қилинади», — дейди президент.
2022 йил 1 июлдан Мажбурий ижро бюросида Алимент тўловлари жамғармаси ташкил этилади ва унга дастлаб 50 миллиард сўм йўналтирилади. Мазкур маблағлар уч ой ичида ундириш имкони бўлмаган алиментларни тўлашга ажратилади ва кейинчалик бюро томонидан ундириб олинади.
Изоҳ (0)