Журналист Мухбир Далиев Telegram каналида мактаб ўқувчилари учун мўлжалланган ягона электрон таълим платформаси «Kundalik.com» тизимида аёллар гигиеник воситаси реклама қилингани акс этган суратни эълон қилди. Истеъмолчилар ҳуқуқларини ҳимоя қилиш агентлиги ҳолатга муносабат билдирди.
Қайд этилишича, ўсиб келаётган ёш авлодга реклама таъсирида маънавий зарар етказилишининг олдини олиш мақсадида агентлик томонидан «Кундалик» МЧЖга вояга етмаган шахсларга мўлжалланмаган маҳсулотларнинг реклама ва маркетингига йўл қўймаслик бўйича сўров хати юборилган. Натижада мазкур реклама «Кундалик» платформасидан олиб ташланган.
Маълумот учун, платформадан фойдаланиш учун ўқувчи ойига 10 минг сўм тўлов қилади. Ҳозирда «Kundalik.com» тизимида Ўзбекистонда 5—6 миллион ўқувчи рўйхатдан ўтган. Жами тўловлар миқдори 5,5 миллион долларни ташкил этади.
Ўзбекистон мактабларида «Кундалик» электрон тизимини татбиқ этиш 2019 йилдан бошланган эди. Бошланғич даврда тизимдан фойдаланиш бепул бўлган, 2020 йил ноябридан пуллик тартибга ўтган. Ўшанда тизимдан бир йиллик фойдаланиш баҳоси бир ўқувчи учун 9200 сўм эди.
Ушбу тизимнинг татбиқ этилиши ўқитувчи ва ота-оналарнинг барчаси томонидан ҳам бирдек илиқ кутиб олинмаган. Хусусан, Халқ таълими вазирлиги томонидан таклиф этилаётган пуллик кундалик тизими болаларнинг бепул таълим олиш ҳуқуқига дахл қилмайдими, деган масала мунтазам кун тартибига чиқиб туради.
Изоҳ (0)