Бутун ҳаёти ва меҳнат фаолиятини қишлоқ хўжалиги ривожига бағишлаган таниқли агроном ва ташкилотчи раҳбар, Ўзбекистон Қаҳрамони, меҳнат фахрийси Иброҳим Файзуллаев шу йил 25 февраль куни 89 ёшида вафот этди, деб хабар беради ЎзА. Унинг вафоти муносабати билан мамлакат раҳбарияти, хусусан, президент Шавкат Мирзиёев ҳамдардлик билдирди.
Иброҳим Файзуллаев 1933 йил 25 августда Сурхондарё вилоятининг Денов туманида туғилди. Ўрта мактабни тугатиб, меҳнат фаолиятини 1949 йилда жамоа хўжалигида оддий ишчи сифатида бошлади. Кейинчалик Самарқанд қишлоқ хўжалиги институтини агроном мутахассислиги бўйича тамомлаб, Денов туманининг Собир Раҳимов номидаги жамоа хўжалигида энтомолог-агроном, бош агроном ҳамда хўжалик раиси, Сурхондарё вилояти қишлоқ ва сув хўжалиги бошқармаси бош агрономи каби лавозимларда фидокорона меҳнат қилди.Аввалроқ академик Эдвард Ртвеладзе 80 ёшида ,академиклар Турғунпўлат Даминов 81 ёшида Сайдиаҳрол Тўхтаев 79 ёшида, Ўзбекистоннинг фахрий журналисти Рустам Обидов 72 ёшида, академиклар Темурбек Усмонов ва Толиб Мўминов, Олим Маматқул Жўраев 65 ёшида, академик Бахтиёр Назаров 77 ёшида вафот этгани тўғрисида хабар берилганди.Деҳқончилик соҳасининг сирларини чуқур эгаллаган, бой билим ва ҳаётий тажрибаси, бор куч-ғайратини эл-юрт ишига бағишлаган миришкор инсон умрининг охиригача ўз касбига содиқ қолиб, сўнгги йилларда ҳам Денов туманида ғалла-уруғчилик хўжалиги бошлиғи лавозимида самарали ишлаб, кўпчиликка ибрат ва намуна бўлди.
Иброҳим Файзуллаев кўп йиллик меҳнат фаолияти давомида ўзини ер илмининг ҳақиқий билимдони, замонавий агротехнологиялар ва хўжалик юритиш усулларини пухта эгаллаган ташкилотчи раҳбар, меҳнатсевар, камтарин ва ватанпарвар инсон сифатида намоён этиб, бутун мамлакатимизга танилди.
У республикамизда қишлоқ хўжалиги соҳасидаги кенг кўламли ислоҳотларни амалга ошириш, фермерлик ҳаракатини ривожлантиришга ўзининг ҳалол меҳнати, амалий ташаббуслари билан муносиб ҳисса қўшди.
Хусусан, Денов туманининг ижтимоий-иқтисодий ривожини таъминлаш, аҳолининг турмуш шароитларини яхшилаш, таълим, тиббиёт ва маданият масканлари қуриш ва обод қилиш, янги боғ ва хиёбонлар барпо этиш, ёшларни она юртга муҳаббат ва садоқат руҳида тарбиялашда жонбозлик кўрсатди.
Иброҳим Файзуллаев мамлакатимизнинг сиёсий-ижтимоий ҳаётида ҳам фаол иштирок этиб, Ўзбекистон Олий Мажлиси депутати сифатида ҳам самарали фаолият олиб борди.
Иброҳим Файзуллаевнинг давлатимиз ва халқимиз олдидаги улкан хизматлари юксак даражада эътироф этилиб, у 1993 йили «Ўзбекистон Республикасида хизмат кўрсатган қишлоқ хўжалик ходими» ҳамда 1996 йилда Ўзбекистон Қаҳрамони фахрий унвонлари билан тақдирланган эди.
Мамлакатимиз қишлоқ хўжалиги соҳасининг улкан намояндаси, меҳрибон устоз, самимий ва камтарин инсон Иброҳим Файзуллаевнинг ёрқин хотираси қалбларимизда ҳамиша сақланиб қолади.
Шавкат Мирзиёев, Танзила Норбоева, Нурдинжон Исмоилов, Абдулла Арипов, Тўра Боболов
Изоҳ (0)