Андижон вилоятининг Хонобод ва Хоразм вилоятининг Хива туманларида фуқароларни ноқонуний тарзда ўқишга киритиб қўйиш билан боғлиқ жиноятлар аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Хонобод шаҳар бўлими томонидан ИИБ билан ҳамкорликда тезкор тадбир ўтказилган. Унда фуқаро У.М. фирибгарлик йўли билан даромад орттириш мақсадида фуқаролар О. ва Н.нинг ишончига кириб, уларни 7 минг доллар эвазига Қирғизистон Ўш давлат университетига ўқишга киритиб, кейинчалик ўқишини Андижон давлат университетига кўчириб беришни ваъда қилгани аниқланган. У олдиндан 2 минг доллар олган вақтида ашёвий далиллар билан ушланган.
Шунингдек, департаментнинг Хива туман бўлими томонидан ДХХ билан ўтказилган тезкор тадбирда ҳам шунга ўхшаш ҳолат аниқланган. Фуқаролар М.А. ва Б.С. олдиндан тил бириктириб, фуқаро Г.ни Қозоғистондаги олий таълим муассасасининг юриспруденсия йўналишига ўқишга киритиб, кейинчалик танишлари орқали ўқишини Тошкент давлат юридик университетига кўчириб бериш эвазига 1000 доллар олган вақтида ашёвий далиллар билан ушланган
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Мавзуга доир:
Изоҳ (0)