Сурхондарёда отасига тегишли ерни 32,5 млн сўмга сотиб юборишга уринган божхона инспектори қўлга олинди

Сурхондарё вилоятининг Жарқўрғон туманида отасининг номидаги ерни ноқонуний равишда сотиб юборишга уринган шахс ушланди, деб хабар беради ЎзА.

Маълум қилинишича, ДХХ Сурхондарё вилояти бошқармаси ходимлари туманнинг «Қумқишлоқ» маҳалласида яшовчи, Сурхондарё вилояти божхона бошқармаси «Гулбаҳор» чегара постида инспектор бўлиб ишлаётган Қ.Р.ни ноқонуний равишда ер сотмоқчи бўлганида қўлга олган.

Аниқланишича, бу ерни унинг отаси 2020 йил йил 22 декабрда «Электрон онлайн аукционларни ташкил қилиш маркази» давлат унитар корхонаси томонидан ўтказилган онлайн савдода Ю 139-040298-сонли баённома асосида 9 ой муддат ичида 120 миллион сўм инвестиция киритиш шарти билан қўлга киритган.

Фуқаро Қ.Р. отаси М.С. номига расмийлаштирилган «Қораянтоқ» маҳалласи ҳудудидаги ушбу 8 сотих ер майдонини фирибгарлик йўли билан ўзганинг анча миқдордаги пул маблағларига эга бўлиш мақсадида сотмоқчи бўлган.

Қ.Р. «Деҳқонобод» маҳалласида жойлашган умумий овқатланиш шохобчасида тадбирга жалб қилинган Содиқ исмли шахсдан ер учун 32 миллион 550 минг сўм пулларни олган вақтида ашёвий далиллар билан қўлга олинган.

Ҳолат юзасидан фуқаро Қ.Р.га нисбатан Жиноят кодексининг 168-моддаси (фирибгарлик) 2-қисми «а» банди билан жиноят иши қўзғатилиб, тергов ҳаракатлари олиб борилмоқда.

Аввалроқ Тошкентда ҳокимлик захирасидаги ерни 420 минг долларга сотмоқчи бўлган корхона ходими ушлангани, Тошкент вилоятида ижарадаги 30 сотих ерни қарийб 340 млн сўмга сотган шахслар қўлга олингани, Қибрайда 7 гектар ерни 225 минг долларга сотишга уринган туман ҳокимлигининг собиқ ходимлари ушлангани тўғрисида хабар берилганди.